Kryeministri Edia Rama ka reaguar në lidhje më akuzat e ngritura ndaj Thaçit dhe Velelit, për krime ndaj njerëzimit gjatë luftës së Kosovës.
Nëpërmjet një shkrimi në rrjetin social Facebook, Rama shprehet se nuk ka gjetur fjalët e duhura në momentin që ka lexuar listën e Tribunalit Special, ku ishin emrat e kriminelëve të supozuar të Luftës Çlirimtare të Kosovës.
Kryeministri paralajmëron se nesër do të dalë në një prenoncim publik për të gjithë shqiptarët dhe e mbyll shkrimin e tij me thirrjen: RROFTË KOSOVA dhe sot më shumë se kurrë NDERIM UDHËHEQËSVE TË LUFTËS ÇLIRIMTARE.
Reagimi i plotë:
Qëkur e kam marrë lajmin e listës së Tribunalit Special dhe kam lexuar emrat e kriminelëve të supozuar të Luftës Çlirimtare të Kosovës, përpiqem po nuk arrij të formuloj fjalitë e duhura për të shprehur indinjatën time!
Do të shprehem publikisht nesër me një mesazh për të gjithë shqiptarët, por jam e do të jem deri në fund, në krah të të gjithë atyre që luftuan me armë për ta çprangosur Kosovën e burgosur në ferrin e Sllobodan Milosheviçit, duke mbyllur me gjak, nder e lavdi një histori padrejtësie historike në zemër të Europës!
RROFTË KOSOVA dhe sot më shumë se kurrë NDERIM UDHËHEQËSVE TË LUFTËS ÇLIRIMTARE