“Kopja plasi sheshit”/ Ish-deputeti shpërthen ndaj Shahinit: Ministren e përkund idiotësia

Ish-deputeti i PD-së, Luçiano Boçi ka folur sërish në lidhje me provimet e maturës. Ai ka publikuar një denoncim, ku tregon se nuk janë respektuar rregullat dhe gjatë gjithë provimit është kopjuar.

Boçi i kthehet edhe ministres Besa Shahini dhe thotë që i gjithë procesi i provimit ishte degradim total.

Kujtojmë që studentët protestuan kundër testit të Gjuhë-Letërsisë.

Postimi i plotë:

Matura e sivjetme vazhdon të na mbajë të gozhduar para lajmeve për xhevahiret që ka prodhuar dhe për katastrofën e dëshmuar në sistemin arsimor.

Ndërsa ministren e lumturon dhe e përkund idiotësia dhe i gënjen trurin Turi, nuk reshtin denoncimet, të cilat tregojnë degradimin absolut të këtij procesi.

Rezultatet kanë përmbysur çdo investim. Notat e marra janë jashtë rrjedhës logjike dhe tolerancës qe lejon zhvendosja nga vlerësimi i vazhdueshëm që ka marrë nxënësi.

Kopja plasi sheshit dhe ndihma ishte e ngjashme me qeset që shpërndante qeveria për militantët.

Me selektim e përcaktim.

Denoncimi i mëposhtëm rrëzon dhe atë pak entuziazëm idiotesk të Shahinit për zgjidhjen me sukses të Turit nga 10 mijë maturantë.