Ditën e sotme avokati Kujtim Cakrani ka rënë pre e dhunës nga dy persona në qytetin e Vlorës.
Ngjarja ndodhi orët e para të mëngjesit, ku pranë zyrës së tij janë paraqitur agresorët të cilët më parë e kanë sharë dhe pastaj goditur, duke u larguar me shpejtësi nga aty.
Fillimisht ata kërkuar të heqë dorë nga një çështje që ka të bëjë me rrëmbimin e një personi.
Ndërkohë nga ana tjetër, vetë Cakrani është shprehur se këta persona i njeh dhe sipas tij nuk është hera e parë që ndodh ky kërcënim.
Pas ngjarjes ai ka shkuar menjëherë dhe ka denoncuar në polici, ndërsa kjo e fundit nuk ka ende një njoftim zyrtar lidhur me autorët e dyshuar.
“Unë sot në mëngjes kam ardhur në zyrë, dhe kam shkuar në një lokal përpara zyrës, dy persona me makinë të zezë, që i kam marrë dhe targën më kanë ardhur dhe më kanë kërcënuar. Më kanë kërkuar që të heq dorë nga një çështje që lidhet me rrëmbimin e një personi, dhe unë mbroj palën e familjes së viktimës.
Këta persona më kanë ardhur dhe në zyrë, i kam identifikuar personat, unë zyrën e kam survejuar me kamera dhe i kam të fotografuar të paktën njërin prej tyre që ka qenë më aktiv. Më kanë goditur në fytyrë, kam lajmëruar policinë, unë jam avokat dhe kësaj çështje do ti shkoj deri në fund. Jam kërcënuar dhe herë të tjera nga këta persona, jam i detyruar që të kërkoj mbrojtje nga policia e shtetit.
Jam në të drejtën time që të kryej detyrën dhe nuk intimidohem aspak nga këta persona. Në këtë vend është bërë vazhdë që të dhunohen avokatët dhe gjyqtarët, do ti shkoj deri në fund që këta persona të tërhiqen”, u shpreh Cakrani.