KQZ ka marrë sot vendimin për kryebashkiakun e Matit Agron Malaj.
Mësohet se me 5 vota pro, Komisioni Qendror i Zgjedhjeve ka caktuar që Malaj nuk përfshihet në kushtet e ndalimit të ushtrimit të detyrës.
Komisioni Qendror i Zgjedhjeve shqyrtoi sot rezultatin e verifikimit të Prokurorisë së Përgjithshme për Malajn, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funsione publike”.
Në dokumentin e Prokurorisë, thuhet se për Malaj nuk rezulton të ketë indicie apo të dhëna a rrethana, fakte të bëra publike apo informacion, për: Veprimtari kriminale të kryer jashtë territorit të Republikës së Shqipërisë; Urdhër kërkimi ndërkombëtar lidhur me kryerjen e e ndonjë vepre penale prej tij; Marrjen e ndonjë mase dëbimi ndaj tij; Përdorimin e gjeneraliteteve të tjera.
Kujtojmë që në janar të këtij viti, PD publikoi dënimin e Agron Malajt për armëmbajtje pa leje, duke kërkuar për Prokurorinë e Përgjithshme që të verifikonte të kaluarën e ish-gardistit.
Më tej kjo forcë politike pretendonte shkarkimin nga detyra, të kryebashkiakut që ka dalë nga zgjedhjet e 30 qershorit.
Në dokumentin që publikoi PD më 7 tetor 1999, Agron Malaj është dënuar me vendim të formës së prerë nga Gjykata e Matit me 10 muaj burg për “plagosje me dashje” dhe “mbajtje pa leje të armëve luftarake”.