2 mln euro pasuri me origjinë kriminale, kush është durrsaku që iu morën sot dy pallate

Një goditje e fuqishme në drejtim të pasurive të ndërtuara mbi bazën e veprimtarive kriminale është regjistruar sot në Durrës.

Policia bën të diur se dy pallate dhe një hotel në lagjen Nr. 13 në Durrës janë sekuestruar, pasi dyshohen si të përfituara nga veprimtaria kriminale në fushën e trafikimit të drogës dhe shfrytëzimit të prostitucionit.

Specialistët për Hetimin e Krimit Ekonomik e Financiar në Drejtorinë Vendore të Policisë Durrës, në vijim të punës për gjurmimin, evidentimin dhe sekuestrimin e aseteve të përfituara nga veprimtaria kriminale, referuan në Prokurorinë e Rrethit Gjyqësor Durrës, në vitin 2017 materialet në ngarkim të shtetasit P. T., për veprën penale “Pastrimi i produkteve të veprës penale ose veprimtarisë kriminale”.

Shtetasi Pëllumb Tuda është i dënuar për veprat penale “Trafikimi i drogave” dhe “Shfrytëzim Prostitucioni”.

51-vjeçari është një emër i njohur për drejtësinë dhe policinë shqiptare,pasi ka dalë në pah të paktën në dy episode të rënda.

Tuda doli me leje nga burgu në korrik të vitit 2014 dhe plagosi dy persona në këtë qytet duke u arrestuar sërish.