Paraditja e sotme nisi me një ngjarje tronditëse për Elbasanin.
Pas një atentati të mirëorganizuar, u plagos 55-vjeçari Ardian Capja, emër i njohur në qytet.
Ai është qëlluar në rrugicën pas banesës së tij nga një makinë në ecje, duke marrë një plumb në shpatull.
Grupi hetimor zbardhi disa minuta pas ngjarjes se Ardian Çapja ishte qëlluar nga një armë automatike e modifikuar si snajper. Ndërsa autorët dogjën automjetin, një furgon pasagjerësh me targa ta falsifikuara, në zonën e Fushë-Mbretit.
Ai tashmë është transportuar në Spitalin e Traumës ku do t’i nënshtrohet një ndërhyrje kirurgjikale.
Kujtojmë se konflikti i fisit Çapja në Elbasan është i hershëm dhe daton që prej vitit 2005.
Atentati i tretë
Ky është atentati i tretë ndaj Ardian Çapjas. Ai i ka shpëtuar edhe dy atentateve në të kaluarën, në gusht dhe dhjetor të vitit 2017. Edhe dy atentateve të mëparshme ai u ka shpëtuar me plagë të lehta.
Në gusht 2017, shtëpa e Çapjave u sulmua me predhë antitank. Edhe atëherë objektiv ishte Ardian Çapja.
Ndërsa 6 muaj më pas, në dhjetor 2017, ndaj Ardian Çapjes u hap zjarr nga një automjet në lëvizje. Persona të paidentifikuar kanë survejuar zonën për disa kohë dhe kanë parë që Ardiani ka qenë shumë pranë lokalit të tij, duke lëshuar breshëri plumbash, por nga ngjarja fatmirësisht nuk pati të lënduar.
Konfliktet që nga viti 2005
Kujtojmë se 55 vjeçari Ardian Çapja u ka shpëtuar më herët të paktën dy atentateve, ndërkohë që ngjarjet lidhen me konflikte të vjetra që fisi i tyre ka pasur në qytetin e Elbasanit. Më 3 shkurt 2016 u vranë tre pjesëtarë të kësaj familjeje, kurse Florenc Çapja i shpëtoi një atentati të ndodhur në qershor 2016, ku mbeti i plagosur shoku i tij, Bledar Muça, me të cilin po udhëtonte në një makinë. Ndër vite, familja Çapja është akuzuar si e përfshirë në ngjarje kriminale, por edhe ka qenë pre e tyre.
Vrasja e Sokol Çapjes
Gjithçka ka nisur në vitin 2005, ku Sokol Çapja u përfshi në konflikt me ish-kreun e Qarkullimit Rrugor në Elbasan, Fadil Mema. Pas kësaj ngjarjeje mbeti i vrarë Sokol Çapja dhe si autorë u akuzuan nipat e oficerit të Policisë. Kjo pasoi me vrasjen e kunatit të Memës, Ardian Ibrahimi, në maj 2006.
Në vitin 2012, Gentian Beqiri, një nga të akuzuarit për vrasjen e Sokol Çapjes, u ekzekutua, ndërsa ishte lënë në arrest shtëpie. Ndërsa në mars 2015, në Torino të Italisë, u ekzekutua Fadil Mema.
Më pas, në shkurt 2016, mbetën të vrarë Agron Çapja, nipi i tij Ardit Sinakoli dhe Eno Bedalli, ndërsa mes tetë të plagosurve ishte dhe Florenc Çapja.
Ndërsa në qershor 2016, Ardian Çapja, Florenc Çapja dhe Bledar Muça u arrestuan për sulm ndaj disa efektivëve civilë të Policisë pasi dyshonin se do të kryenin atentat ndaj tyre.
