LIGJET E BIZNESIT
Pas një kohe të gjatë heshtjeje, kryetari i prezencës së OSBE në Shqipëri, ambasadori Bernd Borchardt ka folur për Reformën Zgjedhore, e cila pritet të mbyllet brenda 31 majit të këtij viti.
Ai ka reaguar me anë të një deklarate, ku i bën thirrje palëve politike të vijojnë në rrugën e gjetjes së kompromisit.
Ambasadori thekson se do të ishte me vend që Reforma të gjejë dakordësinë e palëve, dhe në deklaratën e tij për mediat shton se do të vijojë të mbështesë dialogun për teknologjitë e reja të votimit dhe për ndryshimin e sistemit zgjedhor.
“Përgëzoj partitë politike shqiptare për rifillimin e dialogut për reformën zgjedhore dhe për marrëveshjet e arritura deri tani në Këshillin Politik, ku është vendosur dialog mes qeverisë, opozitës parlamentare dhe asaj jashtëparlamentare.
Ne po ndjekim me interes të veçantë përpjekjet e partive për kompromis për çështjet të cilat OSBE/ODIHR i ka vlerësuar si problematike për shumë vjet tashmë: depolitizimi i administratës zgjedhore, balanca gjinore në listat zgjedhore, ngritja e një strukture të posaçme për eliminimin e presionit ndaj administratës dhe të shpërdorimit të burimeve shtetërore, mekanizma më të fortë kundër krimit zgjedhor, kontrolli dhe transparenca e financimit të fushatës, transparenca e medias gjatë zgjedhjeve dhe dhënia fund e praktikës së të ashtuquajturave kaseta të gatshme. Njëkohësisht, reforma zgjedhore nuk duhet të dobësojë tërësinë e reformave të tjera të rëndësishme.
Unë i nxit të gjitha partitë në Këshillin Politik për Reformën Zgjedhore të vijojnë të ecin në rrugën e gjetjes së kompromiseve konstruktive dhe ta finalizojnë reformën zgjedhore, në të mirë të Shqipërisë dhe të aspiratave të saj për integrim.
Prezenca e OSBE-së në Shqipëri dhe ODIHR-i do të vijojnë të ofrojnë mbështetje për përmbylljen e kësaj reforme të rëndësishme sa më shpejt, idealisht brenda 31 majit, sikurse janë zotuar partitë politike. Po ashtu, ne do të vijojmë të mbështesim dialogun për teknologjitë e reja të votimit dhe për ndryshimin e sistemit zgjedhor.”, thuhet ndër të tjera në deklaratë.
