Kryeministri Edi Rama ka pranuar për herë të parë idenë e zgjedhjeve të parakohshme. Por me një kusht. Ai ka sfiduar opozitën që të fitojë në zgjedhjet vendore të qershorit qoftë edhe një bashki më shumë, duke treguar mbështetjen popullore e më pas, në shtator do të zhvillohen zgjedhjet e parakohshme.
“Ta harrojnë pushtetin në tavolinë. Nëse ju fitoni një bashki më shumë se ne në qershor, bëjmë zgjedhje të parakohshme në shtator. Ju nuk fitoni dot as në Kukës e as në Skrapar.
Keni nisur avazin, për të mos u futur në zgjedhje. Punë e madhe. E bëtë edhe dy vjet më parë dhe falë nesh nuk dolët fishek. Me qeverinë tuaj i keni humbur zgjedhjet dhe përsëri e hëngrët fjalën dhe iu rikthyet kontestimit të rezultatit”, deklaroi Rama.
Kreu i qeverisë vlerësoi punën e Bashkisë së Tiranës, duke thumbuar sërish opozitën.
“Tirana, si çdo qytet tjetër, nuk ka të krahasuar me atë që ishte para se të vinim ne, ose më mirë para se të merrnim edhe pushtetin qendror, edhe atë lokal. Jemi ende në mes të rrugës dhe kurrë rruga jonë nuk do të katandiset si rrugët e mbetura rrugëve të atyre që kanë dalë në rrugë për t’i bërë keq qeverisë. Por aty në rrugë do të mbeten, për të keqen e tyre”, u shpreh Rama.
