Qëlluan me armë duke i bërë rezistencë policëve, kush janë 2 vëllezërit që ngritën në këmbë Skraparin (EMRAT)

Mbrëmjen e djeshme një ngjarje e rëndë ka tronditur banorët e Skraparit, ku dy vëllezër me probleme mendore kanë dalë në dritare dhe kanë filluar të qëllojnë me kallashnikov në ajër.

E gjithë skena ndodhi rreth orës 20.30 në lagjen “5 shtatori” të qytetit.

Mësohet se dy vëllezërit janë Hasan dhe Hysen Hoxha, përkatësisht 57 dhe 61-vjeç, kanë terrorizuar gjithë qytetin nga krismat e armëve dhe pas mbërritjes së policisë afër banesës së tyre, ata janë frikësuar dhe kanë filluar të qëllojnë sërish.

Pas mbërritjes së policisë, Hyseni ka dalë jashtë ndërsa vëllai është mbyllur brenda duke qëlluar dhe disa herë të tjera.

NJOFTIMI ZYRTAR I POLICISE

Rreth orës 20:40, në Skrapar, në lagjjen”5 Shtatori”, në katin e parë të një pallati, shtetasi H. H., rreth 57 vjeç, me probleme të shëndetit mendor, ka qëlluar disa herë në ajër me armë zjarri.

Në vendngjarje shkuan menjëherë shërbimet e Policisë dhe shtetasi H. H., kur i ka parë punonjësit e Policisë, ka qëlluar në drejtim të tyre dhe është mbyllur në banesë.

Shërbimet e Policisë kanë marrë masa sigurie dhe kanë rrethuar pallatin, duke i bërë thirrje që të dorëzohet, por deri në këto momente ai nuk i është përgjigjur thirrjeve të Policisë.

Në ndihmë të Policisë vendore janë nisur forcat e Ndërhyrjes së Shpejtë të Fierit dhe një grup i negociatave të Reneas.