Protestat në Tiranë, bizneset kërkojnë mbrojtjen e pronës publike dhe private

Dhoma e Tregtisë dhe Industrisë Tiranë dhe 8 shoqata biznesi kërkojnë mbrojtjen e pronës publike e private, identifikimin e autorëve dhe dokumentimin e plotë të dëmeve.

Dhoma e Tregtisë dhe Industrisë Tiranë, së bashku me tetë shoqata të biznesit, dënon aktet e dhunës dhe dëmtimin e pronës publike e private gjatë protestave në kryeqytet. Përmes një deklarate për shtyp, organizatat e biznesit kërkojnë masa konkrete për garantimin e sigurisë dhe mbrojtjen e sipërmarrjeve nga tensionet politike.

Në deklaratë theksohet se e drejta për të protestuar në mënyrë paqësore është një e drejtë themelore, e cila duhet respektuar dhe garantuar nga institucionet shtetërore. Megjithatë, sipas përfaqësuesve të biznesit, asnjë kauzë apo përplasje politike nuk justifikon dhunën, zjarrvënien dhe shkatërrimin e pronës.

“Bizneset, punonjësit dhe pronat e tyre nuk mund të bëhen shënjestër e tensioneve politike”, thuhet në deklaratë, ku nënvizohet se dëmtimi i dyqaneve, bankave, qendrave tregtare dhe ndërtesave të biznesit prek drejtpërdrejt punonjësit, klientët dhe ekonominë e qytetit.

Organizatat i bëjnë thirrje Policisë së Shtetit dhe institucioneve përgjegjëse të marrin masa parandaluese, të forcojnë praninë në zonat e rrezikuara dhe të ndërhyjnë në kohë për të parandaluar aktet e dhunës. Njëkohësisht, kërkohet që veprimet e policisë të jenë profesionale, proporcionale dhe në përputhje me ligjin, duke garantuar sigurinë e protestuesve paqësorë, qytetarëve dhe punonjësve të bizneseve.

Një tjetër kërkesë lidhet me identifikimin e autorëve të akteve të dhunës dhe mbajtjen e përgjegjësisë individuale sipas ligjit. Sipas deklaratës, përgjegjësia nuk duhet t’u atribuohet qytetarëve që ushtrojnë në mënyrë paqësore të drejtën e protestës.

Dhoma e Tregtisë dhe shoqatat e biznesit u bëjnë gjithashtu thirrje organizatorëve të protestave dhe forcave politike të distancohen nga dhuna, të kontribuojnë në uljen e tensioneve dhe të ruajnë karakterin paqësor të tubimeve.

Në fokus është edhe dëmi ekonomik i shkaktuar nga protestat. Organizatat kërkojnë dokumentimin e plotë të dëmeve dhe komunikim të drejtpërdrejtë mes autoriteteve dhe sipërmarrjeve të prekura, për të mundësuar denoncimin, hetimin dhe ndjekjen e procedurave përkatëse.

Deklarata është firmosur nga Dhoma e Tregtisë dhe Industrisë Tiranë, Këshilli i Agrobiznesit Shqiptar, Manifaktura Shqiptare, Shoqata e Ndërtuesve, Shoqata Shqiptare e Turizmit, Shoqata e Industrisë së Përpunimit të Qumështit, Shoqata e Industrisë Ushqimore Shqiptare, Shoqata e Bimëve Medicinale dhe Shoqata e Grave Profesioniste Afariste dhe Zejtare.

Në përfundim, organizatat theksojnë se mbështesin lirinë e shprehjes, protestën paqësore dhe dialogun, ndërsa kundërshtojnë çdo akt dhune dhe shkatërrimi, pavarësisht se nga kush kryhet.