LIGJET E BIZNESIT
Sërish ndryshime në qeveri. Kryeministri Edi Rama ka larguar Besfort Lamallarin nga drejtimi i Ministrisë së Brendshme dhe në vend të tij ka vendosur Ervin Demon.
Sipas njoftimit të kryeministrisë, Ministria e Brendshme do të zgjerojë gjithashtu fushën e përgjegjësive, pasi në strukturën e saj do të përfshihen edhe çështjet që lidhen me pushtetin vendor. Për rrjedhojë, Demo do të ketë në përgjegjësi si rendin dhe punët e brendshme, ashtu edhe pushtetin vendor.
Besfort Lamallari u bë pjesë e kabinetit qeveritar më 11 shtator 2025, në nisje të mandatit të katërt të qeverisë Rama, kur u emërua ministër i Drejtësisë. Më pas, gjatë ndryshimeve të kabinetit të bëra më 26 shkurt, ai u zhvendos në krye të Ministrisë së Brendshme, institucion ku më herët kishte ushtruar për një periudhë të gjatë detyrën e zëvendësministrit.
Ndryshimi i fundit vjen pikërisht një vit pas emërimit të parë të Lamallarit në kabinet. Ai nuk do të mbajë më një post ministror, por kryeministri Rama bëri të ditur se Lamallari do të vijojë angazhimin si pjesë e ekipit të tij në Kryeministri.
Ndërkohë, një tjetër ndryshim në kabinet është zyrtarizuar në Ministrinë e Shëndetësisë. Pas miratimit në Kuvend me 79 vota pro, Klodiana Spahiu u betua para Presidentit të Republikës, Bajram Begaj, duke marrë zyrtarisht detyrën e ministres së Shëndetësisë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Spahiu zëvendëson në këtë post Evis Salën, e cila dha dorëheqjen nga detyra. Sala e argumentoi largimin e saj me angazhimet dhe projektet akademike që synon të ndjekë në vijim.
