Italianët “pushtojnë” Shqipërinë, renditen si turistët kryesorë

Të dëgjosh të flitet italisht në Tiranë është bërë e zakonshme. Në grupe të mëdha dhe të vogla, por edhe cifte, të moshave të ndryshme ata i gjen jo vetëm në zonat e preferuara nga turistët, por edhe në rrugët e rrugicat e brendshme të kryeqytetit.

Të dhënat e Institutit të Statistikave tregojnë se këtë vit, shumica e vizitorëve të huaj që u akomoduan në Shqipëri vijnë nga Italia, me 23% të totalit deri në prill. Pasojnë shqiptarët e Kosovës me 13 % të totalit, vizitorët nga Mbretëria e Bashkuar me 8 % të totalit, vizitorët nga Gjermania dhe Franca përbëjnë përkatësisht 8 % dhe 6 % dhe nga vende të tjera 42 %.

Në total, sipas INSTAT-it, në prill të këtij viti numri i vizitorëve që u akomoduan në strukturat turistike në Shqipëri u rrit me 19,7 %, krahasuar me të njëjtin muaj të vitit të kaluar.