LIGJET E BIZNESIT
Kryeministri Edi Rama deklaroi se Shqipëria ka bërë përparim të rëndësishëm në kuadër të Kapitullit 5 të negociatave me Bashkimin Europian, që lidhet me “Prokurimin Publik”.
Gjatë fjalës së tij, kreu i qeverisë duke cituar të dhëna nga Gjykata Europiane e Llogarive theksoi se vendi ynë paraqitet pozitivisht në disa prej indikatorëve kryesorë të përcaktuar nga BE-ja për konkurrueshmërinë dhe transparencën në procedurat e prokurimit publik.
Rama përmendi faktin që në BE mesatarja e kontratave me një ofertues përbën 32,3 për qind të kontratave, ndërsa në Shqipëri janë në masën 23,5 për qind.
“Nëse e vendosim në kontekst pozicionin e vendit tonë në indikatorët thelbësor që përcakton BE, konkurrueshmëria, dhe po të shohim në tabelën e konkurrueshmërisë pozicionin e vendit tonë, nëse në mesatare kontratat me një ofertues të vetëm përbëjnë 32,3 për qind të kontratave në vendet e BE, për Shqipërinë janë në masën 23, 5 për qind. Nëse në shtetet anëtare janë një grup i madh vendesh që fillojnë nga 57,4 dhe zbresin në 35,8 për qind, Shqipëria është midis tyre dhe vendeve si Suedia 22,9, Gjermania 22,6. Vendi ynë është mbi këto me shumë pak, pra me 23, 5 për qind. Edhe në numrin e ofertuesve për procedurë, që raporti e përcakton si 3,2 ofertues si mesatare e BE, Shqipëria është me 3,7 ofertues mesatarisht. Në Shqipërinë e vitit 2025 numri i prokurorimeve që janë mbyllur dhe kanë pasur një ofertues janë 12 për qind, ndërkohë që mesatarja e BE është 14 për qind. Mbi fakte Shqipëria është në një fazë shumë të avancuar të përparimit në këtë fushë dhe në pozicionimin në tryezën e negociatave me BE”, tha Rama.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
