LIGJET E BIZNESIT
Qeveria ka vendosur për herë të parë një kufi minimal monetar për kontratat koncesionare dhe partneritetin publik privat. Sipas këtij vendimi, kufiri minimal për koncesionet dhe PPP-të do të jetë 5 mln lekë, një përcaktim që ndikon drejpërdrejt në trajtimin e kontratave koncesionare dhe PPP-ve, për të cilat deri më tani nuk kishte një prag minimal të përcaktuar.
Ndërkaq, përveç kufirit për PPP-të, vendimi parashikon edhe ulje të disa pragjeve monetare në procedurat e prokurimit publik, në përputhje me ndryshimet e kursit të këmbimit dhe përafrimin me pragjet e aplikueshme në Bashkimin Europian.
Në sektorin klasik, kufiri i lartë monetar për procedurat e prokurimit për punë publike do të ulet nga 603 mln lekë në 528.7 milionë lekë. Ndërkohë, për prokurimet për mallra, shërbime dhe konkurse projektimi, kufiri do të zbresë nga 16 mln lekë në rreth 13.7 mln lekë.
Të njëjtat ndryshime do të aplikohen edhe për kontratat sektoriale, ku kufiri i lartë për punët publike do të mbetet i njëjtë me sektorin klasik, ndërsa për mallrat dhe shërbimet pragu do të ulet nga 49 mln lekë në rreth 42.3 mln lekë.
Vendimi aktual, i miratuar në maj të vitit 2024, përcakton kufijtë monetarë që ndajnë procedurat e prokurimit sipas vlerës së kontratës, duke përcaktuar rregullat procedurale që duhet të ndiqen nga autoritetet kontraktore. Ai ndalon gjithashtu ndarjen artificiale të kontratave me qëllim shmangien e procedurave të prokurimit publik.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
