Marketingu në Messenger po fiton më shumë terren/ Platforma vijon zgjerimin, pavarësisht konkurrencës. Meshkujt, audienca kryesore

Messenger po vazhdon të mbetet një nga platformat më të përdorura të komunikimit në Shqipëri, duke ruajtur një audiencë të gjerë dhe aktive edhe në vitin 2025. Sipas të dhënave nga Digitalreport, reklamat në Messenger mund të arrijnë deri në 926 mijë përdorues në vend, një tregues që platforma vazhdon të ketë ndikim të fortë në mënyrën se si shqiptarët komunikojnë dhe konsumojnë përmbajtje online.

Statistikat tregojnë se Messenger arrin rreth 33.5% të popullsisë totale të Shqipërisë, ndërsa depërtimi tek përdoruesit e internetit shkon në 37.9%. Kjo do të thotë se më shumë se një në tre përdorues interneti në vend mund të arrihet përmes reklamave në aplikacion, duke e bërë Messenger një nga kanalet më të rëndësishme për marketingun digjital dhe bizneset që synojnë audiencën shqiptare.

Të dhënat tregojnë gjithashtu se platforma po vazhdon të rritet. Brenda vetëm tre muajve, audienca e raportuar e Messenger është rritur me 5.3%, ose rreth 46.3 mijë përdorues më shumë. Ndërkohë, krahasuar me të njëjtën periudhë të një viti më parë, rritja arrin në 6%, që përkthehet në afro 52.3 mijë përdorues shtesë. Kjo tregon se, pavarësisht konkurrencës nga aplikacione të tjera sociale, Messenger mbetet ende shumë i përdorur në Shqipëri.

Një tjetër element interesant është shpërndarja sipas gjinisë. Meshkujt dominojnë audiencën e platformës me 60.3% të totalit, ndërsa femrat përbëjnë 38.4%. Edhe tek përdoruesit mbi moshën 18-vjeçare, diferenca mbetet e dukshme, me 51.9% të meshkujve që mund të arrihen përmes reklamave në Messenger, kundrejt 31.4% të femrave.

Sa i përket grupmoshave, përdoruesit më aktivë rezultojnë ata nga 25 deri në 34 vjeç. Në këtë kategori, meshkujt përfaqësojnë 16.9% të audiencës totale të reklamave në Messenger, ndërsa femrat 10%. Edhe grupmosha 35-44 vjeç mbetet shumë aktive në platformë, duke treguar se Messenger nuk përdoret vetëm nga të rinjtë, por edhe nga përdorues me profil më të konsoliduar profesional dhe familjar.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Messenger vazhdon të ruajë një prezencë të konsiderueshme edhe tek përdoruesit mbi 55 vjeç. Kjo e bën platformën një mjet komunikimi me audiencë të larmishme, që shtrihet në pothuajse të gjitha grupmoshat./Tv Scan