LIGJET E BIZNESIT
Borxhi që qeveria po merr tek qytetarët e saj është bërë më i shtrenjtë. Ndërkohë që për të gjithë ata që investojnë në letrat me vlerë afatgjata, ky është një lajm i mirë. Të dhënat tregojnë se yield-et e bonove 10-vjeçare iu kthyen rritjes në ankandin e muajit prill. Sipas të dhënave nga Banka e Shqipërisë, yield-i uniform i këtyre instrumenteve u rrit në 4.95%, nga 4.72% që kishte qenë në ankandin e mëparshëm.
Nga 4 miliardë lekë që ishte shuma e shpallur për financim nga Ministria e Financave, vlera totale e kërkesave arriti në 4.78 miliardë lekë. Ministria e Financave vendosi ta rrisë shumën e emetimit në 4.6 miliardë lekë.
Pjesërisht, rritja e yield-it të emetimit mund të shpjegohet edhe me këtë lëvizje. Rregullorja e ankandeve të obligacioneve parashikon që yield-i emetimit të jetë uniform me yield-in e kërkesës më të lartë të pranuar.
Për momentin, tregu financiar vendas duket i qetë, pavarësisht sinjaleve për një rritje të pritshme të inflacionit. Edhe në ankandin e bonove 12-mujore, të zhvilluar këtë javë, yield-i mesatar i ponderuar pësoi përsëri rënie, duke zbritur edhe njëherë poshtë normës bazë të interesit.
Një tendencë të ngjashme shfaqën, më herët këtë muaj, edhe obligacionet 15-vjeçare. Yield-i uniform i pranuar u rrit lehtë në 5.75%, nga 5.67% që kishte qenë në ankandin e mëparshëm, të muajit shkurt.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Fakti që as yield-et e instrumenteve afatgjata nuk po shënojnë lëvizje shumë të rëndësishme është një tregues se tregu, për momentin, nuk duket veçanërisht i shqetësuar për një rritje të shpejtë dhe të fortë të normave.
Nga ana tjetër, gjendja përgjithësisht likuide e tregut dhe ulja e rreziqeve të perceptuara rreth borxhit publik sovran vazhdojnë të favorizojnë paralelisht normat relativisht të leverdishme të huamarrjes qeveritare.
