Lufta në Iran rrit kostot, kompania më e madhe në botë njofton rritjen e çmimit të prezervativëve

Rritja e çmimeve globale të naftës po prek edhe një produkt thelbësor për shëndetin publik: prezervativët. Kompania malajziane Karex, prodhuesi më i madh në botë i profilaktikëve, ka paralajmëruar një rritje të çmimeve deri në 30% në muajt në vijim. Arsyeja lidhet drejtpërdrejt me pasojat e konfliktit në Iran dhe destabilizimin e zinxhirëve të furnizimit, veçanërisht për shkak të tensioneve në Ngushticën e Hormuzit.

Sipas drejtorit ekzekutiv, Goh Miah Kiat, cituar nga “La Repubblica”, kompania përdor materiale me bazë petrokimike si amoniaku, etanoli dhe vaji silikoni, kostot e të cilave janë rritur ndjeshëm. Vetëm çmimi i vajit të silikonit është rritur me rreth 30%, ndërsa lateksi është dyfishuar. Në total, kostot e prodhimit janë rritur me 25-30%, duke e bërë të pashmangshme transferimin e këtyre kostove tek konsumatori.

Megjithatë, Karex nuk pret rënie të kërkesës. Përkundrazi, përdorimi i prezervativëve priret të rritet në periudha pasigurie ekonomike dhe sociale. Në vitin 2026, kërkesa globale është rritur me rreth 30%, ndërsa vonesat në transport kanë krijuar mungesa në treg.

E themeluar në vitin 1988, Karex prodhon rreth 5 miliardë prezervativë në vit dhe furnizon marka ndërkombëtare si Durex.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern