LIGJET E BIZNESIT
Ministri i Infrastrukturës dhe Energjisë, Enea Karakaçi, inspektoi punimet për ndërtimin e nënstacionit elektrik “Tirana 3” në zonën e Petrelës, një investim që synon forcimin e sigurisë energjetike në kryeqytet. Gjatë inspektimit, ku ishin të pranishëm edhe përfaqësues të Ministrisë Gjermane, ambasadës gjermane dhe bankës KfË, ministri theksoi rëndësinë strategjike të këtij projekti për furnizimin me energji në Tiranë.
“Ky investim është shumë i rëndësishëm për sigurinë energjetike të Tiranës pasi krijon një lidhje unazore me pjesë të tjera të nënstacioneve të Tiranës dhe është një bashkëpunim shumë i suksesshëm me kfË i cili në fakt në vazhdën e investimeve dhe bashkëpunimeve shumë të mira me Operatorin e Sistemit të Transmetimit edhe përsa i përket linjave të tjera të intekonjeksionit, siç është ajo e Shqipërisë me Maqedoninë e Veriut e cila nga pjesa e palës shqiptare është rreth 86% të punimeve të kryera”, – tha Karakaçi.
Nënstacioni i ri po ndërtohet në një zonë ku më parë nuk ka pasur infrastrukturë të tillë dhe do të lidhet përmes tre linjave 110 kV me nënstacionet ekzistuese të Traktorëve, Selitës dhe Farkës. Ndërkohë që, duke folur për zhvillimin e shpejtë urban të Tiranës, Karakaçi theksoi se investimet në rrjetin energjetik janë të domosdoshme për të përballuar rritjen e kërkesës.
“Mjafton të prek këtu disa investime shumë të rëndësishme që ne jemi duke bërë në Tiranë, siç është nënstacioni i Qendrës, që do të jetë një nënstacion i ri nëntokësor, në qendër të qytetit. Nënstacioni i Zogut të Zi. Kemi një nënstacion të ri në Kinostudio dhe po ashtu investimi që po bën Operatori i Sistemit të Transmetimit, përsa i përket linjës Tirana 1, Zogut të Zi dhe të gjitha investimeve të tjera në Transmetim dhe në Shpërndarje”, – tha ministri.
Sipas ministrit, onvestimet në sektorin energjetik po shtrihen edhe në zona turistike dhe rajone të tjera të vendit, nga bregdeti Adriatik dhe Jon deri në Alpet shqiptare, me synim garantimin e një furnizimi të qëndrueshëm në të gjithë territorin.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
