Përgjysmohet numri i të huajve që bëjnë dhëmbët dhe hundën në Shqipëri

Të huajt po vijnë në Shqipëri për turizëm e më pak për trajtime shëndetësore. Ndërsa deri vitin 2024, trendi për të bërë dhëmbët, hundën apo trajtime të tjera estetike në Shqipëri ishte në rritje, gjatë 2025-ës panorama ka ndryshuar.

Të dhënat e fundit të Institutit të Statistikave tregojnë se nga janari deri në nëntor 2025, për qëllime shëndetësore kanë hyrë në territorin shqiptar vetëm 366 të huaj nga 623 që ishte numri në të njëjtën periudhë të një viti më parë. Një rënie e ndjeshme vjetore prej 41.3%.

Arsyeja kryesore që ka “joshur” të huajt të vijnë në Shqipëri vitet e fundit për trajtime shëndetësore kanë qenë cmimet e ulëta. Kjo për shkak të konkurrencës së shtuar në tregun vendas për këto lloj shërbimesh, ku më të përhapurat janë rregullimi i dhëmbeve dhe hundës.