LIGJET E BIZNESIT
Është ndarë nga jeta në mënyrë të parakohsshme Brunilda Isaj, sekretare e përgjithshme e Shoqatës Mikrofinanca Shqiptare. Një ndër ekspertet më të mira të tregut financiar dhe financave personale. Një profesioniste e gatshme për të ndihmuar çdokënd me ekspertizën e saj dhe gjithmonë e përditësuar mbi zhvillimet ekonomike në vend dhe botë.
Brunilda Isaj ka mbajtur disa pozicione drejtuese në kompani të rëndësishme të sektorit financiar dhe telekomunikacioneve në vend, si Credins Bank, Alpha Bank, Vodafone Albania dhe NOA.
Gjithashtu, ajo ishte një ndër themelueset kryesore të Shoqatës “Mikrofinanca Shqiptare”, duke qenë një ndër zërat kryesorë në informimin e publikut në këtë sektor.
Brunilda ishte një bashkëpunëtore e vyer e medias në Shqipëri. Nuk i tha kurrë jo një interviste apo kërkese të gazetarëve për informacion apo analizë. Ajo ishte gjithmonë aty, me buzëqeshjen e ëmbël dhe zërin e qetë, e gatshme për të shpjeguar dhe ndihmuar qytetarët apo bizneset në vendimarrjen e tyre.
Brunilda Isaj ishte një bashkëpunëtore e ngushtë e Fast News Economy. Së fundmi ajo ishte pjesë e podcastit “Money Hour”, të Fast News, duke analizuar sesi shpenzojnë shqiptarët dhe duke dhënë këshilla të vlefshme për qytetarët.
Stafi i Fast News Economy i shpreh ngushëllimet familjes dhe të afërmve të Brunildës. Do të na mungosh e mira Brunë!
