Më pak aksidente, por shkaktarët kryesorë mbeten të rinjtë

Numri i aksidenteve rrugorë ka pësuar rënie. Të dhënat e fundit të Institutit të Statistikave tregojnë se në muajin dhjetor 2025 janë regjistruar 130 aksidente rrugore, nga të cilët 176 persona janë të aksidentuar (të vrarë dhe të plagosur). Ndërsa gjatë gjithë vitit 2025, numri i aksidenteve rrugore ka qenë në total 1.375, duke u ulur me 17.5 %, krahasuar me vitin 2024.

Nga statistikat e detajuara rezulton se në 87.7 % të rasteve, aksidentet rrugorë kanë ndodhur si pasojë e sjelljes së drejtuesve të mjeteve. Numri më i lartë i aksidenteve, gjatë kësaj periudhe, është shkaktuar nga grup-mosha 25-34 vjeç, e cila përbën 33.1 % të numrit total të aksidenteve.

Në muajin dhjetor 2025, numri më i lartë i aksidenteve rrugore ka ndodhur përgjatë ditës së premte me 20,0 %, ndërsa numri më i ulët i aksidenteve ka ndodhur përgjatë ditës së mërkurë dhe të dielë me nga 10,8 % secila.

Numri më i lartë i aksidenteve rrugore ka ndodhur përgjatë harkut kohor 14:00 – 17:00, duke zënë 22,3 % të numrit të aksidenteve rrugore gjithsej.