LIGJET E BIZNESIT
Sipas anketës së Këshillit të Investimeve, në vitin 2025, 59% e bizneseve vlerësojnë se komunikimi me administratën tatimore është përmirësuar, një tregues ky në rritje krahasuar me periudhën 2019–2024. Megjithatë, ky perceptim mbetet më i ulët se niveli i regjistruar në vitin 2018, duke treguar se ende ka hapësirë për përmirësim të mëtejshëm në marrëdhënien mes biznesit dhe administratës tatimore.
Ndërkohë, për sa i përket shërbimeve elektronike tatimore, të dhënat tregojnë një trend më pozitiv që nga viti 2022, veçanërisht në drejtim të besueshmërisë, aksesit dhe cilësisë së të dhënave. Pavarësisht këtij përmirësimi, niveli i kënaqësisë së bizneseve mbetet ende më i ulët krahasuar me periudhën 2017–2019.
Sa i takon sistemit të fiskalizimit, në vitin 2025 vërehet një rritje e perceptimit pozitiv të bizneseve lidhur me kënaqësinë nga shërbimi ndaj klientit gjatë procesit të fiskalizimit. Megjithatë, sfidat mbeten, pasi 7 nga 10 kompani mendojnë se është e nevojshme krijimi i një shërbimi elektronik me mbështetje telefonike, për të adresuar problematikat që hasen në praktikë.
Në të njëjtën kohë, anketa evidenton edhe një trend rritës në pjesëmarrjen e bizneseve në trajnimet e organizuara nga Drejtoria e Përgjithshme e Tatimeve, veçanërisht ato që lidhen me zbatimin e legjislacionit tatimor, fiskalizimin dhe ligjin mbi të ardhurat. Ky interes në rritje tregon nevojën e vazhdueshme të bizneseve për informim dhe qartësi mbi ndryshimet ligjore dhe procedurale./Tv Scan
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
