OSHEE, me inteligjencë artificiale &#8211; Tender 98.65 mln lekë për ngritjen e platformës, synohet ulja e gabimeve dhe sakt

Inteligjenca Artificiale do shërbejë si mjet mbështetës dhe analitik për operacionet e përditshme të Operatorit tw Shpërndarjes së Energjisë Elektrike. Kjo kompani ka hapur tenderin për ndërtimin dhe implementimin e një platforme të integruar, teksa fondi limit është 98.65 mln lekë.

Projekti synon krijimin e një motori inteligjent analitik që përpunon në mënyrë të vazhdueshme të dhënat e sistemeve operative të OSHEE, automatizimin e analizave për procese kritike si matjet, rrjeti, mirëmbajtja, ndërprerjet dhe ngarkesat, si dhe ndërtimin e një paneli monitorimi në kohë reale të integruar me sistemet ekzistuese. Parashikohet gjithashtu implementimi i një moduli rekomandues, i cili sugjeron veprime operative të bazuara në modele IA.

Sipas dokumenteve të tenderit, projekti përfshin ndërtimin e një sistemi të avancuar IA që do të mbështesë operatorët e OSHEE Group në analizën e të dhënave, monitorimin e sistemeve dhe përmirësimin e vendimmarrjes, pa zëvendësuar rolin e njeriut në proceset kritike. Platforma është konceptuar të funksionojë si një asistent inteligjent, ku çdo veprim automatik që ndikon në operacionet thelbësore kërkon konfirmim të detyrueshëm nga operatori.

Sipas objektivave të përcaktuara, platforma e Inteligjencës Artificiale pritet të rrisë ndjeshëm efikasitetin operacional, duke reduktuar kohën e analizave deri në 80%, duke përmirësuar saktësinë e analizave mbi 95% dhe duke ulur gabimet manuale në leximin e matësave deri në 70%. Po ashtu, projekti synon rritjen e produktivitetit të ekipeve operative dhe përmirësimin e cilësisë së të dhënave./Tv Scan