Më pak aksidente rrugore në shtator, por të rinjtë më të rrezikshmit në timon

Numri i aksidenteve ka shënuar rënie në shtator. Sipas të dhënave të fundit të Institutit të Statistikave, në këtë periudhë vlerësohet një rënie e aksidenteve rrugore me 16.3% kundrejt një viti më parë.

“Në muajin Shtator 2025 janë regjistruar 102 aksidente rrugore, nga të cilët 135 persona janë të aksidentuar (të vrarë dhe të plagosur).  Gjatë periudhës Janar-Shtator 2025, numri i aksidenteve rrugore është ulur me 16.3 %, krahasuar kjo me të njëjtën periudhë të një viti më pare”. theksohet në publikimin e INSTAT-it.

Një tjetër pikë ku ndalet INSTAT është fakti se në shumicën e rasteve aksidentet janë si pasojë e shoferëve teksa grupmosha problematike sipas të dhënave të përpunuara në këtë periudhë është ajo e 25-34 vjeç.

“Aksidentet rrugore, në 91.2 % të rasteve, kanë ndodhur si pasojë e sjelljes së drejtuesve të mjeteve. Numri më i lartë i aksidenteve, në këtë periudhë, është shkaktuar nga grup-mosha 25-34 vjeç, e cila përbën 26.5 % të numrit total të aksidenteve.

Në muajin shtator 2025, numri më i lartë i aksidenteve rrugore ka ndodhur përgjatë ditës së Hënë me 19.6 %, ndërsa numri më i ulët i aksidenteve ka ndodhur përgjatë ditë së mërkurë, enjte dhe të premte me nga 9.8 % secila

Numri më i lartë i aksidenteve rrugore ka ndodhur përgjatë harkut kohor 14:00-17:00 dhe 19:00-24:00, duke zënë secila nga 23.5 % të numrit të aksidenteve rrugore gjithsej” thuhet në publikimin e INSTAT.