LIGJET E BIZNESIT
Nga Aurora Sulce, Producente Ekzkeutive për Biznesin në A2 CNN
Prej vitesh tashmë, bujqësia dhe blegtoria janë futur në krizë, duke bërë që fermerët të eksperimentojnë vazhdimisht me produktet që kultivojnë apo kafshët që rrisin, duke parë nevojat e tregut dhe mundësitë për të shitur. Një situatë që në një pjesë të mirë të rasteve shoqërohet me humbje të konsiderueshme financiare, për shkak mungesës së tregut, por edhe rregullave të qarta të lojës. Së fundmi, konstatohet një dukuri e re. Fermerët po brakstisin kafshët dhe po zhvendosen drejt bletëve, duke e parë rritjen e tyre dhe prodhimin e mjaltit si një alternativë të lezerdisshme.
Të dhënat tregojnë se numri i bagëtive në vend është tkurrur me ritme të frikshme, duke u përgjysmuar në harkun kohor të 10 viteve: nga 506 mijë gjethë që ishin në vitin 2015 në 272 mijë aktualisht.
Nga një ecuri krejt e kundërt është karakterizuar bletaria. Në 10 vitet e fundit numri i koshereve në vend është dyfishuar, duke arritur aktualisht në 587 mijë të tilla nga 271 mijë që ishin në vitin 2015.
Ndërkohë bujqësia vazhdon rënien e saj të lirë, duke bërë që fermerët të prodhojnë më pak e ne të gjithë, të kemi më pak produkte bujqësore vendase në treg. Të dhënat e fundit tregojnë se bujqësia shënoi një rënie prej 2.76% në tremujorin e parë të këtij viti, duke thelluar krizën që ka nisur tashmë të jetë e dukshme në katër vitet e fundit.
Por cilat janë problemet kryesore të sektorit? Realiteti me të cilin përballen fermerët është I vëhstirë, me probleme të vjetra e një pjesë të krijuara rishtazi. Më kryesoret vlerësohen: mungesa e financimeve; mungesa e fuqisë punëtore; mungesa e orientimit në prodhim; niveli i lartë i informalitetit; fragmentarizimi i tokës dhe niveli i ulët i teknologjisë.
