Turistët shtrenjtojnë jetesën në vend, inflacioni në qershor rritet në 2.4%

Shtimi i turistëve ka shtrenjtuar jetesën në vend. Në qershor, inflacioni arriti në 2.4% me rritje 0.3% kundrejt të njëjtës periudhë të një viti më parë. Nga të dhënat e Institutit të Statistikave rezulton ndikimin kryesor në këtë rritje të kostos së jetesës e kanë shpenzimet për argëtim, produktet ushqimore, si dhe pijet alkoolike, të cilat kanë pësuar edhe rritjen më të fortë të cmimeve. Por edhe me rritjen e qershorit, inflacioni mbetet brenda objektivit të Bankës së Shqipërisë për një luhatje të tij në kufijtë e 3 për qind.

Ndryshimet vjetore të grupeve kryesore

Krahasuar me qershorin e një viti më parë, rritja më e madhe e çmimeve vërehet në grupin “Argëtim dhe kulturë” me 6,8 %, pasuar nga grupet “Ushqime dhe pije joalkoolike” dhe “Pije alkoolike dhe duhan” me 3,5 % secili, “Mobilje, pajisje shtëpie dhe mirëmbajtje e shtëpisë” me 3,0 %, “Veshje dhe këpucë” dhe “Qira, ujë, lëndë djegëse dhe energji” me 1,8 % secili, “Hotele, kafene dhe restorante” me 1,7 %, “Komunikimi” me 1,6 %, “Mallra dhe shërbime të ndryshme” me 1,2 %, “Shërbimi arsimor” me 0,9 % dhe “Shëndeti” me 0,6 %.

Nga ana tjetër çmimet e grupit “Transporti” shënuan ulje me 0,5 %. Brenda grupit të ushqimeve çmimet e nëngrupit “vajra dhe yndyrna” patën një rritje me 7,6 %, pasuar nga nëngrupet “zarzavate përfshirë patatet” me 5,3 %, “qumësht, djathë dhe vezë” me 4,6 %, “mish” me 4,0 %, “peshk” me 2,4 %, “fruta” me 1,3 %, etj.