LIGJET E BIZNESIT
Individët kanë shtuar kërkesën për kredi për blerje banesash, ndërsa bizneset për investime. Kjo ka rezultuar nga Vrojtimi mbi Aktivitetin Kreditues për tremujorin e dytë të këtij viti, publikuar nga Banka e Shqipëisë.
“Në tremujorin e dytë të vitit 2025, bankat ndoqën politika të ngjashme kreditimi për bizneset në krahasim me një tremujor më parë. Bankat ruajtën standarde, kushte e terma kreditimi të njëjta, si edhe miratuan një raport të ngjashëm kredish me një tremujor më parë, në segmentin e bizneseve.
Bankat vijojnë të jenë prudente në vlerësimin e rrezikut, duke aplikuar marzhe më të larta në kreditë e kategorizuara me rrezik. Kuadri kreditues për individët, ngjashëm me bizneset, u raportua pothuajse i pandryshuar në tremujorin e dytë të vitit”, theksohet në raport.
Bankat mbajtën të pandryshuar standardet, kushtet dhe termat e kreditimit për kreditë akorduar individëve në tremujorin e dytë. Nga ana tjetër, ato raportuan një shkallë më e lartë miratimi kredish për individët, në sajë të vlerësimeve të bankave për cilësinë e kredimarrësve dhe të historikut të individëve në tregun e punës.
Në linjë me pritjet e një tremujori më parë, kërkesa për kredi e sektorit privat u raportua më e lartë. Nevojat e shtuara për financim – në mbulimin e investimeve të planifikuara nga bizneset, si edhe në blerjen e banesave apo financimin e konsumit nga individët, – treguesi i besimit të biznesit dhe të konsumatorit, si edhe ambienti i favorshëm i normave të interesit nxitën kërkesën e shtuar për kredi të agjentëve ekonomikë në tremujorin e dytë.
“Përqasja e bankave në kreditimin e bizneseve pritet të mbetet e njëjtë edhe në tremujorin e tretë të vitit, për të gjitha kategoritë e biznesit si edhe në të gjitha kreditë lëvruar sipas qëllimit të përdorimit. Në të kundërt, politikat e kreditimit priten të jenë shtrënguese për individët, kryesisht në segmentin e kredive për blerjen e banesave”, thekson Banka e Shqipërisë.
Sipas institucionit mbikëqyrës bankar, kërkesa për kredi e bizneseve pritet të mbetet e lartë për çdo lloj qëllimi të përdorimit. Në të kundërt, kërkesa për kredi e individëve pritet të bjerë në tremujorin e tretë, kryesisht në ato për blerje banesash.
