LIGJET E BIZNESIT
Pavarësisht eksperiencës së hidhur që kaluan shqiptarët me tërmetin e tetorit 2019, që shkaktoi dëme të konsiderueshme, sërish sigurimi i pronës mbetet në nivele të ulëta. Një situatë që ka detyruar qeverinë që ta bëjë sigurimin e banesave të detyrueshëm me ligj. Kjo bazuar në një projektligj që është hedhur për konsultim pubik.
Të dhënat e Autoritetit të Mbikëqyrjes Financiare tregojnë se në periudhën janar-maj të këtij viti, sigurimi i pronës zinte vetëm 16.4% të tregut, ndërkohë që sigurimi i makinave që është i detyrueshëm me ligj përbën 68.4% të tregut, pasuar nga sigurimi i jetës dhe shëndetit me 15.1%.
Ligji për sigurimin e detyrueshëm të banesave
Sigurimi i detyrueshëm i banesave nga tërmetet do të ofrohet nga vetë shteti. Përmes projektligjit të hedhur në Konsultim nga Ministria e Financave i hartuar në Bashkëpunim me Bankën Botërore njoftohet se do të ngrihet “Fondi Kombëtar për Sigurimin e Detyrueshëm nga Tërmetet”.
“Metodologjia e përcaktimit të primit, termat, klasifikimi i banesave mbi bazë rreziku, llogaritet me metodologji aktuariale, bazuar në modelin e rrezikut nga tërmetet të zhvilluar për Shqipërinë, e cila miratohet me vendim të Këshillit të Ministrave, me propozim të Fondit për Tërmetet pas dhënies së pëlqimit nga Autoriteti i Mbikëqyrjes Financiare”, theksohet në draftin e Ministrisë së Financave.
Detyrimin për lidhjen e kontratës së sigurimit nga tërmetet e kanë edhe subjektet e banesave sociale me qira, banesat në proces legalizimi, si edhe njësitë e vetëqeverisjes vendore, të cilët financojnë primin e sigurimit nga buxheti i tyre. Ndërsa buxheti i shtetit financon primin e sigurimit të detyrueshëm nga tërmetet për shtresat sociale në nevojë.
Shqipëria është goditur nga dymbëdhjetë tërmete me magnitudë mbi 6 që nga viti 1900, por duket se vetëm tërmeti i 26 nëntorit 2019 në Durrës mbart një vlerësim konkret të dëmeve të pësuara.
