Të afërmit me probleme, emigrantët shtojnë sasinë e parave që u dërgojnë

Të ardhurat nga emigrantët kanë pësuar rritje këtë vit. Të dhënat e fundit të Bankës së Shqipërisë tregojnë se në tremujorin e parë të këtij viti, emigrantët shqiptarë dërguan pranë familjeve në atdhe 250 milionë euro. Kundrejt të njëjtës periudhë të një viti më parë, kjo shumë rezulton 8.8 milionë euro më e lartë ose 3.6 për qind rritje.

Rritja e nivelit të remitancave shpjegohet me shtrenjtimin e cmimeve, të cilat janë bërë të papërballueshme për shqiptarët dhe vecanërisht për shtresat më vulnerabël, sic janë pensionistët. Nga ana tjetër, ndikim të konsiderueshëm ka dhënë edhe zhvlerësimi i euros. Për shkak të dobësimit të monedhës europiane, në të cilat vijnë kryesisht dërgesat e emigrantëve, për të njëjtën shumë, familjet marrin shumë më pak lek.

Sipas të dhënave nga Instituti i Statistikave, dy qarqet më të varfra të vendit, Kukësi dhe Dibra, janë edhe ato që kanë varësinë më të lartë nga remitancat. Njëkohësisht, në rang vendi, 26 për qind e familjeve shqiptare që marrin para nga jashtë, kanë më pak të ardhura në dispozicion se sa pjesa tjetër e popullsisë.