LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Ekonomia ka shënuar një rritje pozitive edhe në fillim të këtij viti. Por nuk ka vend për shumë entuziazëm, pasi sic thuhet: “djalli fshihet në detaje”. E në ekonomi, këto detaje janë kur lexon shifrat. Cfarë thonë ato?
Në tremujorin e parë të këtij viti, ekonomia u rrit me 3.39%, duke qenë pak a shumë në të njëjtat nivele të vitit 2024.
Por cilat janë burimet e kësaj rritje? Cilët janë sektorët që e kanë gjeneruar atë?
Ndikimin kryesor në rritjen ekonomike e ka dhënë administrata publike me 2.24%. Për këtë sektor, pagat dhe kontributet e punonjësve zënë pjesën kryesore të kontributit në Produktin e Brendshëm Bruto. Sektori i dytë që ka ndikuar është aktiviteti i pasurive të patundshme; pasuar nga tregtia, transporti dhe akomodimi. Ndërkohë që ndërtimi, që vitet e fundit ka qenë motori i zhvillimit të ekonomisë, është ngadalësuar. Ndërkohë që prodhimi, i përfaqësuar nga bujqësia dhe industria. është sërish në rënie. Kësaj tendence negative në tremujorin e parë të këtij viti i është bashkuar edhe informacioni dhe komunikimi.
Por sa ka arritur paga në shtet dhe sa ka qenë rritja e saj që ka ushqyer edhe rritjen e ekonomisë këtë fillim viti?
Rezulton se në tremujorin e parë, paga mesatare bruto në administratën publike arriti në rreth 98 mijë lekë, duke shënuar një rritje prej 13 mijë lekë kundrejt të njëjtës periudhë të një viti më parë ose rreth 13%.
Teorikisht, kur ekonomia rritet, ajo duhet të përkthehet në disa të mira për agjentët kryesorë, që janë qytetarët dhe biznesi. Dhe kur kjo nuk ndodh, atëherë do të thotë se rritja është në letër dhe nuk reflektohet në ekonominë reale.
Një rritje e shëndetshme ekonomike duhet të gjenerojë rritje të punësimit; të ardhura më të larta; rrjedhimisht rritje të konsumit; më shumë investime në shërbime publike dhe ulje të varfërisë.
