LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Një ekonomi që nuk prodhon ose prodhon pak, është një ekonomi e kërcënuar nga tregjet që e furnizojnë atë. Një e vërtetë kjo që vlen në rastin e Shqipërisë, që pjesën më të madhe të produkteve që konsumon, i siguron nga importi. Kjo bën që cmimet që ne paguajmë, kryesisht për mallrat bazikë të konsumit të përdtshëm, si ushqimet, të rëndojnë gjithmonë e më shumë buxhetet tona.
Të dhënat tregojnë se muajin e kaluar, inflacioni, treguesi që mat koston e jetesës në vend shënoi 2.2 për qind, duke qenë në të njëjtin nivel të një viti më parë. Por shqetësues është fakti se inflacioni i cmimeve rezulton gati i dyfishuar në harkun kohor të një viti. Rritja e cmimeve të ushqimeve në maj të këtij viti ka qenë 3.2% përkundrejt rritjes 1.9% në majin e një viti më parë.
Kjo do të thotë se të gjithë ne kemi paguar më shumë për të jetuar. Pasi po të shohim mënyrën sesi i shpenzojmë të ardhurat, shumica shkon për ushqim.
Më saktësisht 39.6% e buxhetit të një familje mesatare në Shqipëri përdoret për ushqime, pasuar nga 4.2% për duhan dhe alkool; 5% për veshje e këpucë; 9.7% shpenzime për banesën etj.
Nëse ekonomia shqiptare do të prodhonte një pjesë të prodykteve që konsumohen masivisht, kjo do të ushtronte presion në uljen e cmimeve, gjë që nuk ka ndodhur. Varësia e lartë nga importi na bën të ekspozuar ndaj asaj që ndodh në tregjet e huaja, prej nga ku furnizohemi. Një situatë që bëhet edhe më alarmante me rrezikun e një krize të re cmimesh që parashikohet të trokasë në të gjithë botën, si pasojë e zhvillimeve gjeopolitike.
Ndikimi do të vinte nëpërmjet partnerit kryesor tregtar që është Bashkimi Europian; pasiguritë do të shtoheshin dhe kjo do të shkaktonte tkurrje të investimeve të huaja dhe remirancave që dërgojnë emigrantët, si dhe një pakësim të lëvizjes së turistëve. Problemet në tregtinë botërore do të pakësonin mundësitë e Shqipërisë për eksporte, ndërsa efektet do të ndiheshin edhe në kursin e këmbimit, të ndikuara nga tensionet globale.
