LIGJET E BIZNESIT
Familjet shqiptare po marrin borxh kryesisht për konsum. Thënë ndryshe, për të përballuar shpenzimet e jetesës së përditshme. Kjo ka rezultuar nga vrojtimi i Bankës së Shqipërisë “Gjendja financiare dhe huamarrja e familjeve në Shqipëri” për gjashtëmujorin e dytë 2024.
“Qëllimi kryesor i huamarrjes mbetet: ‘për konsum’ në 42% të rasteve të huamarrjes, ‘për blerje/riparim prone’ në 23% të rasteve dhe për ‘zhvillim biznesi’ në 12% të rasteve. Pesha e rasteve të huamarrjes për “blerje/riparim prone” dhe për “konsum” kanë shënuar rritje si në terma gjashtëmujorë ashtu edhe në terma vjetorë, ndërsa pesha e rasteve të huamarrjes për “zhvillim biznesi” ka rezultuar në rënie (me 6 pp) krahasuar gjashtëmujorin e kaluar, por ka pasur një rritje të lehtë me 1 pp referuar një viti më pare”, theksohet në raport.
Banka e Shqipërisë evidenton se në rreth 49% të rasteve të raportuara, huamarrja e familjeve rezulton në formën e “kredisë nga institucione financiare”, ku 44% e rasteve janë në trajtë “kredie bankare” (rënie me 1 pikë përqindje krahasuar me 6MI 2024 dhe rritje me 2 pikë përqindje krahasuar me një vit më parë), dhe 6% janë në trajtë “kartash krediti dhe overdraft” (rritje me 9 pikë përqindje krahasuar me 6MI 2024 dhe rritje me 9 pikë përqindje referuar një viti më parë).
Në rreth 34% të rasteve, huamarrja deklarohet në formën e “parasë në dorë” dhe në 16% të rasteve në formë “malli të papaguar”. “Të dyja këto pesha kanë shënuar rënie si në terma gjashtëmujorë (respektivisht me 4 pikë përqindje) dhe në terma vjetorë (përkatësisht me 4 pikë përqindje dhe 2 pikë përqindje)”, thekson Banka e Shqipërisë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Institucioni mbikëqyrës bankar bën të ditur se vrojtimi i radhës mbi gjendjen financiare të familjeve është kryer mbi kampionin rastësor prej 1200 familjesh, ku rreth 87% e tyre (1049 familje) kanë marrë pjesë në procesin e intervistimit duke iu përgjigjur plotësisht ose pjesërisht pyetjeve të pyetësorit.
