LIGJET E BIZNESIT
Në 3 muajt e parë të këtij viti, Autoriteti Kombëtar për Sigurinë Kibernetike ka identifikuar dhe menaxhuar gjithsej 14 incidente kibernetike, duke ndërmarrë masa konkrete për neutralizimin e kërcënimeve dhe mbrojtjen e infrastrukturave kritike.
Shumica e incidenteve lidhen me kompromentimin e aplikacioneve. Konkretisht, 6 raste rezultojnë të jenë sulme që synojnë aplikacione që ofrojnë shërbime, duke rrezikuar funksionalitetin dhe sigurinë e tyre.
Ndërkohë, janë zbuluar 4 raste të Spear Phishing, të cilat përfshijnë përpjekje të targetuara për të mashtruar përdorues specifikë dhe për të fituar akses të paautorizuar përmes komunikimeve të personalizuara. Vetëm 1 sulm është identifikuar si DDoS, për mbingarkesë të sistemeve dhe ndërprerje të funksionimit të shërbimeve. Pra, DDoS është një sulm në rrjet, synimi i të cilës është që një website ose rrjet të shkëputet për një periudhë kohore, duke e ngarkuar me trafik të tepërt dhe duke e bërë shërbimin e tij të padisponueshëm.
Nga ana tjetër, sulme të tipit Ransomware, Shfrytëzimi i dobësive të njohura në sisteme për të depërtuar ose manipuluar funksionimin e tyre, Reconnaissance dhe Full Scanning janë me nga 1 rast secila. Ransomware është enkriptim i të dhënave me qëllim përfitimi financiar përmes shpërblimit. E thënë ndryshe, Ransomware përfshin një lloj programi (malware) që kodon skedarët dhe i mban peng ato derisa individët të japin informacione sensitive ose t’i paguhet një shpërblim sulmuesit.
Reconnaissance dhe Full Scanning janë veprimtari zbuluese ndaj gjithë infrastrukturës, me synim identifikimin e dobësive në arkitekturën digjitale të institucionit.
Gjatë vitit që lamë pas, Autoriteti Kombëtar i Sigurisë Kibernetike ka identifikuar, trajtuar dhe menaxhuar 32 incidente kibernetike, më pak se në 2023./Tv Scan
