Zhvillohet forumi POP, dialogu publik mes qytetarëve dhe kandidatëve për deputetë në Tiranë

Sot në kryeqytet u zhvillua Forumi Publik për qarkun Tiranë, organizuar nga Qendra “Aleanca Gjinore për Zhvillim” në bashkëpunim me Rrjetin “Përballja e Ofertave Politike – POP”. Ky forum i hapur solli përballë qytetarëve kandidatët për deputetë të Tiranës, të cilët prezantuan prioritetet e tyre për zhvillimin e rajonit dhe u përgjigjën pyetjeve konkrete të qytetarëve mbi çështje kyçe si: zhvillimi ekonomik, përfaqësimi i të rinjve, transparenca dhe lufta kundër korrupsionit; arsimi dhe integrimi evropian; përfshirja e qytetarëve në vendimmarrje; angazhimet për grupet e komuniteteve Rome dhe Egjiptiane; lehtësirat për pensionistët etj.

Kandidatët pjesëmarrës ishin nga Aleanca për Shqipërinë Madhështore – z. Jonathan Pano; Partia Lëvizja Bashkë – znj. Bora Mema; Koalicioni Euroatlantik – znj. Diana Toma; Partia Socialiste – z. Erion Malaj; Nisma Shqipëria Bëhet – znj. Dorina Prethi; Aleanca Kombëtare Shqiptare – znj. Elena Kocaqi; Partia Mundësia – znj. Barbara Doda dhe Partia Social Demokrate – z. Dritan Idrizi.

Pjesëmarrësit vlerësuan rëndësinë e këtij formati për promovimin e dialogut të hapur dhe demokracisë pjesëmarrëse, ndërsa të gjithë kandidatët e pranishëm treguan angazhim dhe respekt për barazinë e trajtimit dhe transparencën e komunikimit me qytetarët.

Rrjeti POP do të vijojë organizimin e forumeve të tilla në qarqet e tjera të vendit, duke i dhënë qytetarëve mundësinë të informohen dhe të përfshihen në mënyrë aktive në procesin zgjedhor.

Këto forume zhvillohen në kuadër të projektit “Rrjeti POP për Qeverisje të Mirë dhe Integritet”, me mbështetjen e Olof Palmes International Center dhe Qeverisë Suedeze.