Pilula e re kundër obezitetit vjen nga Kina, SHBA investon miliona

Kailera Therapeutics, një startup i krijuar së fundmi në SHBA me një financim fillestar prej 400 milionë dollarësh, ka licencuar katër terapi të avancuara kundër obezitetit nga gjiganti farmaceutik kinez Jiangsu Hengrui. Në një treg që vlerësohet të arrijë mbi 130 miliardë dollarë deri në vitin 2028, Kailera synon të jetë një nga lojtarët kryesorë që sfidon emrat e mëdhenj si Novo Nordisk dhe Eli Lilly.

Një nga ilaçet eksperimentale që Kailera ka marrë nga Kina, bazuar në hormonin GLP-1, ka treguar rezultate premtuese: 59% e pacientëve humbën mbi 20% të peshës trupore brenda 36 javësh. Dhe më e rëndësishmja? Efektet anësore ishin minimale.

Ron Renaud, një emër i njohur në industrinë e bioteknologjisë me tre kompani të shitura më parë për një total prej 16 miliardë dollarësh, është vendosur në krye të Kailera. Sipas tij, përmes kësaj marrëveshjeje, kompania ka kursyer vite të tëra kërkimi dhe është e pozicionuar mirë për të dalë në treg përpara shumë konkurrentëve të tjerë.

Në sfond qëndron një ndryshim i madh në industrinë globale farmaceutike, gjithnjë e më shumë kompani amerikane po blejnë inovacion nga Kina, ku shkencëtarët e trajnuar në SHBA kanë kthyer vendin e tyre në një fuqi të re në zhvillimin e barnave. Vetëm gjatë viteve të fundit, janë shpenzuar mbi 8 miliardë dollarë për të licencuar molekula kineze.

Nëse gjithçka shkon sipas planit, Kailera pritet të nisë provat klinike të fazës së tretë në SHBA dhe të nxjerrë në treg pilulën revolucionare para vitit 2030, duke sjellë një alternativë më të lehtë, më të lirë dhe më pak invazive ndaj injeksioneve aktuale për humbjen e peshës.

Në një kohë kur mbi 40% e të rriturve amerikanë vuajnë nga obeziteti, ky mund të jetë vetëm fillimi i një revolucioni të ri farmaceutik.