LIGJET E BIZNESIT
Tregu i punës në Shqipëri vazhdon të përballet me një kontrast të forte, ku nga njëra anë papunësia, dhe nga ana tjetër qindra vende pune që mbeten bosh. Vetëm në muajin e fundit, Agjencia Kombëtare e Punësimit dhe Aftësive ka shpallur 1,682 vende të lira pune, në sektorë të ndryshëm të ekonomisë.
Profesionet më të kërkuara janë ata që kërkojnë aftësi të mesme apo teknike. Konkretisht, punëdhënësit kërkojnë 353 punëtorë të thjeshtë krahu, të nevojshëm në sektorë si ndërtimi, prodhimi dhe logjistika. Në të njëjtën kohë, vihet re një nevojë e lartë për punonjës shërbimi, ku përfshihen 37 kamarierë për bare e restorante dhe 29 shitës duke nisur nga marketet e vegjël deri te shitësit e butikëve.
Lista e kërkesave përfshin edhe profesione më të specializuara. Në AKPA janë listuar 17 elektriçistë, punëtorë për përpunimin e duraluminit, operatorë makinerish për gjethe çaji, punonjës në sektorin e peshkimit, dhe magazinierë. Ndërkohë, 25 inxhinierë, kryesisht në fushat e ndërtimit, elektricitetit dhe mekanikës, kërkohen gjithashtu nga kompanitë shqiptare.
Megjithatë, sfida më e madhe nuk është mungesa e vendeve të punës, por mungesa e fuqisë punëtore të kualifikuar dhe të disponueshme. Ekspertët vënë në dukje se një pjesë e madhe e të rinjve synojnë të largohen jashtë vendit, ndërsa një pjesë tjetër refuzojnë punët për shkak të pagave të ulëta ose kushteve të papërshtatshme.
Në këtë situatë, bizneset po hasin gjithnjë e më shumë vështirësi për të rekrutuar punonjës, ndërsa shteti përpiqet të rrisë ndërgjegjësimin dhe aftësimin përmes kurseve profesionale./Tv Scan
