5 gjërat që nuk duhet t’ia tregoni kurrë ChatGPT!

Njerëzit i drejtohen ChatGPT për shumë gjëra,  që nga këshillat për çiftet, ndihma për të shkruar një email profesional, deri tek transformimi i fotografive të qenve në versione njerëzore. Por duke ndarë informacione personale me platforma të inteligjencës artificiale, mund të rrezikoni privatësinë tuaj. Ka disa informacione specifike që ekspertët thonë se nuk duhet t’ia tregoni kurrë një chatbot-i si ChatGPT.

Sapo shkruani diçka në një chatbot, “humbni pronësinë mbi të”, shpjegon Jennifer King, kërkuese pranë Institutit Stanford për Inteligjencën Artificiale të Përqendruar te Njeriu, për Wall Street Journal. Edhe OpenAI vetë paralajmëron: “Ju lutemi, mos ndani informacione të ndjeshme gjatë bisedave tuaja.” Po ashtu, Google i këshillon përdoruesit e Gemini të mos fusin asnjë informacion konfidencial apo të dhëna që nuk do të dëshironin të shiheshin nga një rishikues.

Me këtë në mendje, këtu janë 5 gjërat që nuk duhet t’ia tregoni kurrë ChatGPT-së apo ndonjë chatbot-i tjetër të AI-së:

1. Informacione identifikuese personale

Mos zbuloni të dhëna personale si numri i sigurimeve shoqërore, numri i pasaportës apo patentës, data e lindjes, adresa apo numri i telefonit. Edhe pse disa platforma mundohen t’i fshijnë automatikisht këto të dhëna, është më e sigurt të mos i ndani fare. “Duam që modelet tona të mësojnë për botën, jo për individët”, tha një zëdhënëse e OpenAI për WSJ.

2. Rezultate mjekësore

Edhe pse mund të jetë tundim për të kërkuar ndihmën e një AI-je për të interpretuar analiza apo rezultate mjekësore, chatbot-ët nuk përfshihen në ligjet e mbrojtjes së të dhënave shëndetësore si mjekët apo spitalet. Nëse gjithsesi vendosni të ngarkoni analiza, ekspertët këshillojnë që të redaktoni dokumentet përpara, duke lënë vetëm rezultatet e analizave, pa të dhëna personale.

3. Llogari bankare dhe investimi

Mos ndani kurrë numrat e llogarive tuaja bankare apo të investimeve. Nëse këto të dhëna bien në duar të gabuara, mund të përdoren për të ndjekur ose vjedhur fonde.

4. Të dhëna për llogari dhe fjalëkalime

Edhe pse chatbot-ët po bëhen gjithnjë e më të aftë për të ndihmuar në detyra të ndryshme, nuk janë vende të sigurta për të ruajtur fjalëkalime apo emra përdoruesi. Për këto qëllime, është shumë më e sigurt të përdorni një menaxher fjalëkalimesh.

5. Informacione konfidenciale të punës

Nëse po përdorni ChatGPT për punë — si për të redaktuar dokumente apo shkruar email-e — keni rrezik të zbuloni pa dashje të dhëna konfidenciale të klientëve apo sekrete tregtare. Disa kompani përdorin versione të personalizuara të AI-së, me mbrojtje të avancuar, por në mungesë të tyre, duhet të tregoheni shumë të kujdesshëm.

Si të mbroni privatësinë tuaj?

Nëse vendosni të ndani informacione personale, sigurohuni që llogaria juaj të ketë një fjalëkalim të fortë dhe të aktivizoni autentifikimin me dy hapa. Për përdoruesit që duan të jenë më të kujdesshëm, është mirë që pas çdo bisede ta fshijnë atë manualisht. Shumica e kompanive të AI-së e fshijnë përgjithmonë të dhënat “e fshira” brenda 30 ditësh. Në një botë gjithnjë e më të ndërlidhur me inteligjencën artificiale, ruajtja e privatësisë është më e rëndësishme se kurrë. Ndaj, përdorni chatbot-ët me kujdes dhe përgjegjësi./ nyp