Turistë të varfër vizitojnë Shqipërinë, ja sa janë shpenzimet mesatare për person

Teksa numri i turistëve ka ardhur në rritje në dy vitet e fundit, problem mbetet tipologjia e tyre. Kjo pasi, janë përgjithësisht turistë që shpenzojnë pak para. Të dhënat tregojnë se vitin e shkuar, turistët e huaj që erdhën në Shqipëri shpenzuan 4.9 miliardë euro. Mesatarisht, çdo turist ka harxhuar 426.8 euro. Nga ana tjetër, shqiptarët që i kaluan jashtë pushimet shpenzuan 2.7 miliardë euro. Mesatarisht, secili prej tyre shpenzoi 342 euro.

Të dhënat nga Ministria e Turizmit dhe Mjedisit tregojnë se vitin e shkuar vendin e vizituan 11.7 milionë pushues të huaj nga 10.1 milionë të tillë në 2023-shin. Rritja përllogaritet me 1.6 milionë apo 15.8 për qind. E njëjta pritet të ndodhë edhe këtë vit.

Gjatë këtyre 12 muajve, numri total i net-qëndrimeve në hotele, bujtina dhe apartamente me qira ditore pritet të arrijë në mbi 70 milionë nga më pak se 29 milionë që ka qenë mesatarisht vitet e fundit.

Pas namit të mirë të dalë gjatë 2023-shit, shoqëruar nga kurioziteti që vijoi edhe gjatë vitin e shkuar,  në Shqipëri pritet të vijnë deri në 15 milionë turistë të huaj këto 12 muaj. Duke mësuar nga gabimet e së shkuarës, me udhërrëfyes eksperiencën e vendeve të suksesshme, vendi ndërkohë po ndryshon qasje në drejtim të turizmit, duke synuar më tepër para se sa numra të huajsh.