Sa biznese i kanë në “dorë” plazhet e Shqipërisë?

Numri i subjekteve turistike që paguajnë tarifën e zënies së plazheve publike është rritur përgjatë vitit që lamë pas.

Referuar të dhënave nga Agjencia Kombëtare e Bregdetit për subjektet e pajisura me kontrata për përdorimin e hapësirës së plazhit për sezonin turistik 2022, 2023 dhe 2024, vihet re se vitin e kaluar janë 817 biznese tatimpaguese.

Ndërkohë që numri i subjekteve tatimpaguese për vitin 2022 ka qenë 696 dhe për vitin 2023, është rritur 799.

Pesha specifike sipas llojit të veprimtarisë së subjekteve tatimpaguese të cilat janë përfituese të hapësirave publike në plazhe, është e ndarë në disa kategori, ku zëri më i rëndësishëm është ai i hoteleve dhe strukturave të ngjashme me 23% .

Ndërkaq, 23% e zënë aktivitete të shërbimit të pijeve; 19% janë në fushën Restorante dhe shërbim ushqimor i lëvizshëm dhe  14%  janë në fushën aktivitete të tjera të ndryshme nga fusha e turizmi.

Sa i takon të dhënave e raportuara mbi xhiron e subjekteve për periudhën qershor-gusht rezulton një rritje e konsiderueshme. Në vitin 2023 kundrejt vitit 2022 është një rritje në masën 24%. Në vitin 2024 kundrejt vitit 2023, rritja në masën 10%.

Vetëm gjatë 2024 xhiro e bërë nga faturimet në plazhe arrin në 17 milionë euro.

Për periudhën qershor-gusht 2024 rezulton se sasia e çadrave ka qenë afro  699 mijë. Numri i faturave që kanë përshkrimin çadër /shezllonë rezulton në 402.120.

Nga përllogaritjet e përafërta dhe orientuese të të dhënave konstatohet se subjektet e kontraktuara nga Agjencia Kombëtare e Bregdetit kanë lëshuar mesatarisht 5.5 fatura tatimore të fiskalizuara në ditë.

Nga një analizë që ju bë aktivitetit të subjekteve që përfitojnë nga hapësirat publike në plazhe dhe faturimit të artikujve çadra shezllonë, rezulton se peshën me të madhe e zënë restorantet dhe shërbimi ushqimor i lëvizshëm me 32 %, ndjekur nga Hotele dhe struktura të ngjashme me 28%./Tv Scan