LIGJET E BIZNESIT
Besimi tek ekonomia është rithyer pas dy muajsh rënie. Banka e Shqipërisë ka konstatuar në vrojtimin periodik se treguesi i Ndjesisë Ekonomike (TNE) shënoi një kthesë drejt rritjes me 0.9 pikë në muajin shkurt, pas rënieve të dy muajve të mëparshëm. Niveli aktual i besimit në ekonomi qëndron rreth 7 pikë përqindje mbi mesataren historike. Rritja e treguesit në këtë muaj u përcaktua nga rritja e besimit në sektorët e industrisë, tregtisë dhe atij konsumator. Nga ana tjetër, besimi në sektorin e ndërtimit dhe të shërbimeve regjistruan rënie.
Treguesi i besimit të industrisë (TBI) u zgjerua me 1.1 pikë përqindje në muajin shkurt, duke iu rikthyer rritjes së treguesit pas tkurrjeve të katërt muajve të kaluar. Niveli i tij qëndron rreth 4 pikë përqindje mbi mesataren historike. Rritja e TBI-së u ndikua nga vlerësimet më pozitive të bizneseve për prodhimin industrial aktual si dhe pritjet më optimiste për porositë nga eksportet. Pritjet për çmimet në të ardhmen janë rishikuar për lart krahasuar me muajin e kaluar.
Treguesi i besimit në ndërtim (TBN) u tkurr me 2.1 pikë përqindje në muajin shkurt, duke shënuar rënien e tretë radhazi. Megjithatë, niveli i tij vijon të qëndrojë mbi mesataren historike, me rreth 13 pikë përqindjeje. Rënia e TBN-së u drejtua kryesisht nga vlerësimet më pak optimiste për aktivitetin aktual ndërtues. Pritjet për punësimin shënuan rënie. Gjithashtu në kahun rënës ishin edhe pritjet për çmimet.
Treguesi i besimit në shërbime (TBSH) ra me 1.4 pikë përqindje në shkurt. Pavarësisht luhatjeve në muajt e fundit, niveli i treguesit qëndron mbi mesataren historike me rreth 11 pikë përqindje. Në rënien e TBSHsë kontribuuan vlerësimet më pak optimiste të bizneseve për nivelin aktual të kërkesës. Gjithashtu, pritjet për nivelin e punësimit në të ardhmen janë rishikuar për poshtë. Bizneset kanë ruajtur të njëjtin vlerësim për ecurinë e çmimeve në të ardhmen.
Treguesi i besimit në tregti (TBT) u rrit me 3.2 pikë përqindje në muajin shkurt, pas rënies në dy muajt e mëparshëm. Aktualisht, niveli i TBT-së qëndron rreth 7.5 pikë përqindje mbi mesataren historike (Grafik 2). Në rritjen e TBT-së ndikuan vlerësimet më pozitive të ecurinë aktuale të biznesit të tyre dhe pritjet për nivelin e punësimit në të ardhmen. Pritjet për çmimet në të ardhmen u vlerësuan me rëni.
Treguesi i besimit konsumator (TBK) regjistroi rritje me 2 pikë përqindje në muajin shkurt, duke ndërprerë prirjen rënëse të dy muajve të fundit. Ky nivel është rreth 1 pikë përqindje mbi mesataren historike. Të gjithë komponentët përbërës të TBK-së dhanë kontribute rritëse.
Vlerësimi aktual dhe pritjet për blerjet në shuma të mëdha u rritën këtë muaj ndërkohë që edhe pritjet për situatën ekonomike dhe atë financiare ishin gjithashtu më optimiste. Pritjet e konsumatorëve për çmimet dhe nivelin e punësimit në të ardhmen kanë rënë në muajin shkurt.
