BE “kthen sytë” nga energjia bërthamore – Sa duhet të investojë blloku deri në vitin 2050 për të plotësuar nevojat?

Energjia bërthamore mbetet një nga burimet më të rëndësishme të energjisë në Bashkimin Evropian. Ajo përbën 22.8% të të gjithë energjisë elektrike të prodhuar në bllok.

Pas mbylljeve të centraleve në Gjermani, tani ka vetëm 12 prodhues të energjisë bërthamore në BE. Franca, me 57 reaktorët e saj dhe kapacitet 338 GWh në orë, është prodhuesi më i madh, duke gjeneruar 55% të totalit të Unionit. Spanja renditet më pas me mbi 9%, e ndjekur nga Suedia me gati 8%.

Megjithatë, investimet në energjinë bërthamore nuk po rriten. Shoqata Bërthamore Botërore ka paralajmëruar së fundmi se nuk do të ketë mjaft reaktorë në të ardhmen për të prodhuar të njëjtën energji elektrike si ata që do të mbyllen. Kjo mund të komprometojë strategjinë afatgjatë të BE-së për sigurinë energjetike, thotë organizata.

Si krahasohen investimet e Evropës me ato të Rusisë?

Për momentin, vetëm dy reaktorë të rinj janë në ndërtim e sipër në BE, një në Francë dhe një tjetër në Sllovaki. Gjithsej, janë planifikuar vetëm 12 të tjera në të gjithë bllokun.

Kjo shifër është më pak se vetëm Rusia, që ka planifikuar 14 reaktorë të rinj, gjashtë prej të cilëve janë në ndërtim e sipër.

Për të siguruar nevojat për energji, Shoqata Bërthamore Botërore thotë se BE duhet të investojë të paktën 350 miliardë euro në reaktorë të rinj deri në vitin 2050, si pjesë e një plani gjithëpërfshirës investimi deri në 755 miliardë euro, që përfshin dekomisionimin dhe menaxhimin e mbetjeve.

Polonia, lider i energjisë bërthamore në Evropë?

Investimet bërthamore të BE-së në vitet e ardhshme pritet të fokusohen në Evropën Qendrore dhe Lindore, me dy reaktorë të rinj në Bullgari, një në Republikën Çeke, dy në Hungari, tre në Poloni, dy në Rumani dhe dy në Suedi.

Polonia duket më e gatshme për të rritur prodhimin bërthamor, me 26 reaktorë të rinj të propozuar për t’u shpërndarë në rajone të ndryshme të vendit. Megjithatë, “njësi të reja priten të dalin në sipërfaqe brenda 15 viteve të ardhshme”, thotë Shoqata.

Aktualisht, Franca është vendi i BE-së me varësinë më të madhe nga energjia bërthamore, që mbulon 65% të totalit të prodhuar, e ndjekur nga Sllovakia me 62%.

Në të kundërt, vetëm 1.4% e energjisë elektrike të prodhuar në Gjermani dhe 3.3% në Holandë vinte nga termocentralet bërthamore.