LIGJET E BIZNESIT
Hekurudhat janë braktisur tashmë prej vitesh nga pjesa më e madhe e qytetarëve. Instituti i Statistikave ka publikuar të dhënat e fundit mbi gjendjen e sistemit hekurudhor në vendin tonë.
Sipas statistikave, gjatësia e rrjetit hekurudhor në shfrytëzim në vend është 253 km. Në shfrytëzim janë linjat hekurudhore: Kufi – Gjorm 93 km, Durrës – Elbasan 76 km, Rrogozhinë – Fier 49 km dhe Fier – Vlorë 35 km. Transporti hekurudhor i mallrave kryhet në distanca 0 – 49 km dhe 50 – 150 km.
Volumi i mallrave të transportuara nëpërmjet rrugëve hekurudhore është 133,6 mijë ton, duke shënuar rritje me 1,8 %, në krahasim me tremujorin e katër 2023. Volumi i mallrave të transportuara me hekurudhë në mijë ton-km rezultoi 4.480 nga 4.520 mijë ton-km në të njëjtën periudhë të vitit të kaluar, duke u ulur me 0,9 %.
“Qymyri dhe linjiti, nafta bruto dhe gazi natyror” sipas klasifikimit NST 2007 (Nomeklatura e Statistikave të Transportit), zënë 93,1 % të mallrave të transportuar me hekurudhë , “Lëndë të para të ricikluara; mbetjet e ngurta ( bashkiake) dhe mbeturina të tjera” 6,4 % dhe “Metalet bazë; produktet metalike të fabrikuara, përveç makinerive dhe pajisjeve” zënë 0,5 %.
Në tremujorin e katër 2024, kanë përdorur transportin hekurudhor si mjet udhëtimi 666 pasagjerë, duke shënuar rritje me 68,6 %, krahasuar me të njëjtën periudhë të vitit të kaluar.
Në tremujorin e katër 2024, volumi i mallrave të tregtuara me hekurudhë (eksport dhe import) është 1.856 tonë. Volumi i mallrave të eksportuara me hekurudhë zë 0,2 % ndaj volumit gjithsej të mallrave të eksportuara në vend.
