Shqiptarët gjithnjë e më shumë po heqin makinat e vjetra. Sipas të dhënave nga DPSHTRR, gjatë vitit 2024 janë çregjistruar rreth 8,000 automjete, të cilat kanë një moshë mesatare prej 22 vjetësh, duke shënuar një rritje të konsiderueshme prej 38% krahasuar me vitin 2023.
Faktor kyç që ka ndikuar në këtë rritje është importi i automjeteve të ardhura nga Koreja e Jugut, që ofrohen me çmime të ulëta.
Gjatë periudhës janar-nëntor të vitit 2024, importi nga Koreja e Jugut ka kaluar edhe tregjet e tjera tradicionale nga ku shqiptarët merrnin automjete.
Përkatësisht, 17,400 automjete të ardhura nga ky vend u regjistruan në Shqipëri gjatë 11 muajve të parë të vitit të kaluar, duke kontribuar në rritjen e numrit të njësive të përdorura, por gjithashtu në përmirësimin e flotës në qarkullim.
Nga ana tjetër, shërbimi i Kontrollit Teknik ka regjistruar një rritje prej 8.2% të automjeteve që iu nënshtruan testimeve për vitin 2024.
Nga 428,000 automjete të testuara, vetëm 69% e tyre kaluan me sukses dhe morën dritën jeshile për të vazhduar qarkullimin normal. Pjesa tjetër, që nuk kaluan testin, ngelën për shkak të mangësive teknike të identifikuara gjatë kontrollit.
Arsyet më të zakonshme ishin problemet me sistemet e shkarkimit të gazrave, drejtimit dhe frenimit. Kjo tregon për një nevojë të vazhdueshme për përmirësimin e cilësisë së mjeteve në qarkullim, duke kontribuar në rritjen e sigurisë dhe mjedisit të pastër./TV Scan
