LIGJET E BIZNESIT
Propozimi për shtyrjen e afatit për tatimin e zeruar mbi të ardhurat për hotelet e huaja me 4-5 yje në Shqipëri është shoqëruar me debate në Komisionin e Ekonomisë. Deputeti socialist Blendi Klosi nëpërmjet një projektligji të depozituar në Kuvend kërkon zgjatjen e efektit tatimor deri në vitin 2026, me qëllim zhvillimin e turizmit në Shqipëri.
“Kërkohet 2 vjet shtimi i afatit deri në 2026 dhe po ashtu lënia e një hapësire për 5 vjet nga marrja e statusit për fillimin e investimeve, se projekte të tilla me brande rigoroze marrin një periudhë jo të vogël kohe”, u shpreh deputeti socialist Blendi Klosi.
“Tabela që unë kam 10 projekte me një total të fitimit të tatueshëm 518 milionë lekë, punësime 818 veta. TVSH të paguar 77 milionë lekë. Operojnë me një shkallë të reduktuar TVSH 6% për cdo ofrim shërbimi brenda strukturave akomodouese. Këto përjashtohen nga ligji për taksat mbi ndërtesa. Përsëri përjashtohen edhe nga taksa e ndikimit mbi infrastrukturë”, deklaroi Arjana Dyrshimi, Drejtore e Politikave Tatimore.
Një ligj klientelist, por dhe në shkelje të kodit zgjedhor e cilësojnë deputetët demokrat ndërmarrjen e një nisme të tillë para 11 majit.
“Kur kaloj buxheti në muajin dhjetor u tha që nuk do të ketë ndryshim taksash kemi një strategji afatmesme për të ardhurat dhe mbas qershorit do të rishikojmë mbi këtë strategji. Ndërkohë që buxheti po i miratohej vjen propozimi i Z.Klosit dhe është shkelje e kodit zgjedhor. Ligjet e përkohshme po kthehen në ligje të përhershme. Ligj me porosi lidhet me qëllime elektorale”, u shpreh Jorida Tabaku.
Ministri i financave na gënjeu dhe tha s’do ketë më përjashtime do t’i heqim pak nga pak dhe mbas një muaji vini ju.
Ligj me porosi lidhet me qëllime elektorale.”
“Kur shikoj bujqësinë si po rrënohet dhe s’ka më njerëz nëpër fshatra dhe ju shkoni financoni këta të mëdhenjtë”, theksoi deputeti demokrat Edmond Spaho.
“Nuk përfiton një zë i vetëm por të gjithë që merren me biznes, nga fermerët që shqetësohet z. Spaho e deri tek turizmi”, deklaroi deputeti socialist Blendi Klosi.
Kundërshtime mbi zgjatjen e efektit të tatimit të zeruar pati edhe nga deputeti socialist Erion Braçe i cili kërkon që përjashtimet fiskale të mos kthehen në të përhershme.
“Fitimi i deklaruar çfarë është bërë më pas është riinvestuar apo është akumuluar si pasuri e investitorëve apo është investuar jashtë vendit. Jam pro politikës së ndërtimit të politikës së hoteleve në Shqipëri por kundër politikës për të shitur. Paraja që bëhet në këtë vend të mbetet këtu dhe çdo përjashtim fiskal të jetë i përkohshëm”, u shpreh Braçe.
Përjashtimi i këtyre bizneseve nga tatimi mbi fitimin u miratua në nëntor të vitit 2017, dhe i shtrinte efektet deri në dhjetor 2024. Zgjatja e afati mori miratimin në Komisionin përgjegjës të Ekonomisë dhe pritet të kalojë për votim edhe në komisionet e tjera.
