LIGJET E BIZNESIT
Fondi Monetar Ndërkombëtar ka ripërsëritur shqetësimet për Shqipërinë në raportin e fundit përmbledhës për vendin. Sipas FMN-së, Shqipëria vuan nivelin e ulët të të ardhurave, sa cereku i të ardhurave mesatare europiane, ndërkohë që problem është niveli i lartë i emigracionit dhe plakja e popullsisë.
“Pavarësisht ecurisë pozitive makroekonomike, Shqipëria përballet me sfida të rëndësishme strukturore. PBB-ja për frymë mbetet rreth një e katërta e niveleve të SHBA-së dhe BE-15, të ndikuar nga plakja e shpejtë e popullsisë dhe niveli i lartë i emigracionit. Zbatimi i reformave të thella, që përfshijnë përmirësimin e qeverisjes, forcimin e menaxhimit të financave publike, dhe rritjen e kapitalit njerëzor e produktivitetit, është thelbësor për të nxitur rritje afatgjatë dhe për të arritur harmonizimin ekonomik me standardet evropiane.”
FMN jep vlerësimin edhe për luhatjet në kursin e këmbimit që sollën dhe fuqizimin e mëtejshëm të monedhës kombëtare.
Duke pasur parasysh forcimin e qëndrueshëm të lekut të mbështetur nga bazat ekonomike, anëtarët theksuan se kursi i këmbimit duhet të jetë më fleksibël, ndërsa ndërhyrjet të shërbejnë si një mjet plotësues për luhatjet jo-themelore.
Rënie e borxhit publik, rritje e suficitit por dhe të inflacionit janë parashikimet e FMN për 2025.
“Rritja reale e PBB-së pritet të arrijë mesatarisht rreth 3.5% gjatë periudhës 2024–2029, e nxitur nga konsumatorët vendas, turizmi dhe aktiviteti ndërtimor. Inflacioni në fund të vitit 2024 pritet të jetë rreth 2%, efektet bazë nga një rënie e ndjeshme mujore në fillim të vitit 2024 do ta shtyjnë përkohësisht inflacionin të rritet në gjysmën e parë të vitit 2025, një rikthim i qëndrueshëm në objektiv nuk pritet përpara vitit 2026, për shkak të nivelit të lartë të ngurtësisë në procesin e inflacionit në Shqipëri.”
Bordi i FMN nënvizon rëndësinë e ruajtjes së stabilitetit makroekonomik ndërsa kërkon nga Shqipëria reforma më të thella për të maksimizuar përfitimet nga procesi i pranimit në BE.
