Zhvlerësimi i euros, Banka e Shqipërisë do të tërheqë deri në 350 mln euro nga tregu vitin e ardhshëm

Vitin e ardhshëm, Banka e Shqipërisë planifikon të tërheqë deri në 350 milionë euro në 22 ankande nga tregu i këmbimit valutor. Kjo me qëllim frenimin e tatëpjetës së euros.

Banka e Shqipërisë planifikon të tërheqë së paku 270 milionë euro nga tregu valutor vitin e ardhshëm. Në bazë të sasisë së monedhës europiane që do të futet në vend, blerjet mund të rriten deri në 350 milionë euro.

Ky është niveli më i lartë ndonjëherë i planifikimeve që Banka Qendrore bën për të ndërhyrë në tregun valutor.

“Ka sinjale për një forcim të mëtejshëm të lekut. Për të ruajtur ekuilibrat, Banka e Shqipërisë ndërhyn duke tërhequr valutë nga tregu. Ky është mekanizmi”, tha Dritan Vakaj, kreu i Shoqatës së Agjencive të këmbimit Valutor.

Sipas kalendarit të Bankës Qendrore, ndërhyrjet në tregun valutor pritet të nisin në 25 shkurt për të vijuar në 13 dhe 25 mars. Blerjet planifikohet të përshpejtohen me 9 ankande vetëm në muajt qershor, korrik dhe gusht.

Me ardhjen e vjeshtës , Banka planifikon të realizojë nga një ndërhyrje për secilin muaj, për të përmbyllur blerjet në 5 dhe 19 dhjetor 2025.

“Pritet të hyjë më shumë euro si pasojë e turistëve, por edhe investimeve të huaj, remitancave apo eksporteve. Ndaj gjatë verës janë planifikuar edhe më shumë ndërhyrje”, tha Dritan Vakaj, kreu i Shoqatës së Agjencive të këmbimit Valutor.

Këtë vit Banka e Shqipërisë ka tërhequr nga tregu valutor rreth 320 milionë euro, përfshirë ankandin e fundit të zhvilluar të mërkurën.

Ndërhyrjet e detyruara për shkak të zhvlerësimit me ritme jo natyrale të euros kanë zgjeruar në mbi 6 miliardë euro rezervën valutore të vendit./A2 CNN