Turizmi është shndërruar vitet e fundit në sektorin kryesor të ekonomisë shqiptare, ku qeveria mburret me shifrat e numrit të lartë të të huajve që zgjedhin Shqipërinë për të kaluar pushimet. Padyshim një lajm i mirë, por që për ekonominë do të ishte edhe më i mirë nëse kjo sasi do të përkthehej edhe në cilësi. Thënë ndryshe, nëse do të kishim turistë që shpenzonin në mënyrë të konsiderueshme në vend, ata që ndryshe njihen edhe si turistët elitarë.
Po cfarë tipologjie turistësh kanë ardhur në Shqipëri këtë vit?
Të dhënat e fundit të Bankës së Shqipërisë tregojnë se në 9-mujorin e këtij viti, në vendin tonë kanë pushuar 9.4 milionë turistë të huaj. Shpenzimet totale të tyre në këtë periudhë vlerësohen në 3.8 miliardë euro. Nga përllogaritjet rezulton se mesatarisht një turist i huaj ka shpenzuar në vendin tonë 391 euro.
Me një nivel të tillë shpenzimi, këta konsiderohen turistë të varfër dhe pritshmëritë e ekspertëve të sektorit, janë për tërheqjen e turistëve që shpenzojnë dyfishi.
Shifrat e mësipërme tregojnë qartë se Shqipëria është larg turizmit elitar dhe ajo që kemi aktualisht, është një turizëm masiv, me turistë me “bukë me vete”.
