LIGJET E BIZNESIT
Paralelizëm mes Shqipërisë dhe Britanisë për punën dhe pagat. Këtë ka bërë kryeministri Edi Rama në podcastin “Flasim”, ku kishte të ftuar një shtetas britanik. Rama ka bërë dallimin ndërmjet jetesës në Shqipëri dhe Britaninë e Madhe, duke theksuar se përveçse për të jetuar në Agli duhet të bësh dy punë, gjithashtu është e vështirë të gjesh ndjenjën e komunitetit.
Kryeministri theksoi se rrogat në krahasim me Shqipërinë kanë dallim të madh, por taksat edhe faturat e bëjnë të papërballueshme, ashtu si çdo vend tjetër të Europës.
“Nuk di shumë për Britaninë, por kam ndjesinë se edhe aty nuk është e lehtë të gjesh atë ndjenjë komuniteti që ekzistonte dikur, është bërë shumë më i largët.
Isha në Londër për tu takuar me shqiptarët dhe historia e dëgjuar rëndom, shumë rëndom dhe po flas për njerëz që janë të stabilizuar, punojnë shumë, që nisi nga përpjekja për të bërë gjithçka dhe tashmë kanë familje, fëmijë. Ishte e njëjta gjë: Duhet të bësh dy punë, përndryshe nuk ia del dot.
Sigurisht që në disa aspekte është mirë për fëmijët. Koha e lirë për të shpenzuar me familjen është zero.
Kam pasur këtu njerëz që kanë ardhur nga emigracioni dhe thonë të njëjtën gjë. Kur njerëzit i shohin pagat nga këtu dhe bëjnë krahasimin, sigurisht që është dallim i madh.
Por çfarë ka pas asaj page, kur vjen fjala për qiranë, taksat, fatura për të paguar, është e papërballueshme në Britani, apo kudo tjetër në Evropë.
Pra duhet vendosur në peshore, por megjithatë unë i kuptoj njerëzit që duan të sfidojnë veten, duke u përpjekur aty ku mendojnë se mundësitë janë më të mëdha. Kjo është normale”, tha Rama.
Karl Roberts, ish menaxher i TAP në Shqipëri tani ka zgjedhur të jetojë në Tiranë ku ka blerë dhe një apartament. Në bisedën e tij me kryeministrin, Roberts theksoi ndër të tjera sigurinë që ndjen në Shqipëri duke ecur në rrugë, gjë që nuk e ndjen në asnjë metropol tjetër Europian, gjë që e konfirmon edhe kryeministri.
