LIGJET E BIZNESIT
Rriten lehtë çmimet e mallrave të konsumit të përditshëm. Instituti i Statistikave raporton se në nëntor inflacioni, treguesi që mat koston e jetesës në vend arriti në 2% nga 1.9% që ishte në tetor. Ndërsa kundrejt të njëjtës periudhë të një viti më parë, inflacioni rezulton gati i përgjysmuar. Rritja e cmimeve është ndikuar kryesisht nga shtrenjtimi i produkteve ushqimore, të cilat përbëjnë edhe bazën e konsumit të familjeve shqiptare.
Inflacioni i ushqimeve në nëntor shënoi 3.2% duke qenë 1.2% më e i lartë se inflacioni i përgjithshëm. Kjo do të thotë se familjet shqiptare dhe kryesisht shtresat e varfra, si pensionistët po vuajnë ende rritjen e cmimeve, pavarësisht stabilizimit të situatës që rezulton në letër.
Ndikimi i grupeve kryesore në inflacion:
Rritja vjetore e çmimeve është ndikuar kryesisht nga grupi “Ushqime dhe pije joalkoolike” me +1,11 pikë përqindje, pasuar nga grupi “Qira, ujë, lëndë djegëse dhe energji” me +0,27 pikë përqindje. Gjithashtu, çmimet e grupit “Mobilje, pajisje shtëpie dhe mirëmbajtje e shtëpisë” ndikuan me +0,25 pikë përqindje, çmimet e grupit “Pije alkoolike dhe duhan” me +0,19 pikë përqindje, çmimet e grupit “Veshje dhe këpucë” me +0,15 pikë përqindje, çmimet e grupit “Argëtim dhe kulturë” me +0,12 pikë përqindje, çmimet e grupit “Mallra dhe shërbime të ndryshme” me +0,11 pikë përqindje, çmimet e grupit “Hotele, kafene dhe restorante” me +0,10 pikë përqindje, çmimet e grupit “Shëndeti” me +0,04 pikë përqindje, çmimet e grupit “Shërbimi arsimor” me +0,03 pikë përqindje, çmimet e grupit “Komunikimi” me +0,02 pikë përqindje dhe çmimet e grupit “Transporti” me -0,34 pikë përqindje.
