Amerika zgjedh sot Presidentin e ri. Merr fund dilema Trump apo Harris

Zhvillohen sot zgjedhjet presidenciale në Shtetet e Bashkuara të Amerikës. Miliona njerëz do t’i drejtohen drejt qendrave të votimit, të cilat hapen në disa shtete në orën 05:00 të mëngjesit për të zgjedhur mes Donald Trump dhe Kamala Harris, të cilët garojnë për president të ardhshëm të SHBA-së.

Harris, e cila u bë kandidate e Partisë Demokratike pasi presidenti Joe Biden u tërhoq nga gara, ka mbrojtur të drejtat e abortit dhe është zotuar të ulë kostot e ushqimit dhe strehimit për familjet që punojnë.

Kandidati republikan Trump, i cili i mbijetoi dy tentativave për vrasje këtë vit, është zotuar se do të mbyllë kufirin dhe ka propozuar ulje taksash me vlerë triliona.

Donald Trump e përfundoi fushatën e tij në skenën në Grand Rapids në Michigan, ku është pritur me brohoritjet nga turma. Këtu ai përfundoi edhe fushatat e tij në 2016 dhe 2020.

Ndërsa Kamala Harris sapo ka mbajtur fjalimin e saj të fundit të fushatës në Filadelfia. Ajo i dha fund serisë së saj disajavore të paraqitjeve duke reflektuar mbi një fushatë që ajo thotë se “mblodhi njerëz nga të gjitha anët e kombit dhe të gjitha sferat e jetës”.